Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,013 Auteur: Peire Vidal Genre: Canso Numero: XXXVIII

Ben viu a gran dolor

I	1	Ben viu a gran dolor
		Qui pert son bon senhor,
		Qu'eu perdei lo melhor
		Qu'anc mortz pogues aucir.
	5	E quar non posc morir
		Ni es dreitz qu'om s'aucia,
		Per ma vida gandir
		M'en anei en Ongria
		Al bon rei N'Aimeric,
	10	On trobei bon abric,
		Et aura·m ses cor tric
		Servidor et amic.
II		Et aura·i gran honor,
		Si m'a per servidor,
	15	Qu'eu posc far sa lauzor
		Per tot lo mon auzir
		E son pretz enantir
		Mais d'autr'om qu'el mon sia.
		E quar me saup chauzir
	20	Ni m'ac bela paria,
		Meins en pretz maint croi ric
		Manent ab cor mendic :
		E diran qu'eu o dic
		Del filh de Lodoic.
III	25	Pauc pretz emperador
		Escas ni raubador
		Ni rei galiador
		Qui vol Deu escarnir
		Ni sos baros aunir
	30	Per falsa maïstria.
		Mas al derrier sospir
		Ja no·l valra feunia
		Plus que fetz don Enric,
		Quan camjava nessic
	35	E·l bon Richart aunic
		E Deu que n'envazic.
IV		Reis non ama valor
		Qui vol creire trachor
		Ni ser lauzenjador
	40	Escoutar ni auzir ;
		Quar ser fan joi delir
		E baisson cortezia
		E ponhon en trahir
		Lor senhor cascun dia :
	45	Qu'Alexandres moric
		Per sos sers qu'enriquic,
		El reis Daire feric
		De mort cel que·l noiric.
V		Per qu'eu no volh ricor
	50	Mas de joi e d'amor,
		Quar ben tenh a folor
		Qui trop vol requerir
		So don no pot jauzir.
		Qu'eu no volh manentia
	55	Don tota gens m'azir
		Ni·m diga vilania ;
		Mas am leis que·m trahic
		Cel'ora qu'eu la vic,
		E pos tan m'abelic,
	60	Mos cors. no s'en partic
VI		Que roza de Pascor
		Sembla de sa color
		E lis de sa blancor ;
		E quan la volc bastir
	65	Deus, mes i son albir,
		Qu'en ren als no l'avia.
		En leis volc revenir
		Amors e drudaria ;
		Qu'us esgartz me feric,
	70	Don anc pois no·m garic ;
		Mas garra·m, quan que tric,
		O jove o antic.
VII		Chansos, vai t'en part Vic
		Al gran de bon espic
	75	E di li que no·s tric
		De far tot lo mon ric.
VIII		Alaman, trop vos dic
		Vilan, felon, enic,
		Qu'anc de vos no·s jauzic
	80	Qui·us amet ni·us servic.