Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,039 Auteur: Peire Vidal Genre: Canso Numero: XXXIX

Quant hom es en autrui poder

I	1	Quant hom es en autrui poder,
		No pot totz sos talans complir,
		Ans l'aven soven a giquir
		Per l'autrui grat lo seu voler.
	5	Doncs pos en poder me sui mes
		D'Amor, segrai los mals e·ls bes
		E·ls tortz e·ls dreitz e·ls dans e·ls pros,
		Qu'aissi m'o comanda razos.
II		Car qui al segle vol plazer,
	10	Maintas vetz l'aven a sofrir
		So que·lh desplatz ab gen cobrir,
		Ab semblansa de noncaler ;
		E pois quan ve que sos locs es,
		Contra cel qui l'aura mespres
	15	No sia flacs ni noalhos,
		Qu'en gran dreit notz pauc' occaizos.
III		Tant ai de sen e de saber
		Que de tot sai mon melhs chauzir,
		E sai conoisser e grazir
	20	Qui·m sap honrar ni car tener.
		E tenc m'a l'us dels Genoes,
		Qu'ab bel semblan gai e cortes
		Son a lor amics amoros
		Et als enemics orgolhos.
IV	25	Pretz e valor volh mantener
		E bonas domnas obezir
		Et a corteza gen servir.
		E non ai gran cura d'aver.
		Mas pero, s'eu poder agues,
	30	Non es coms ni ducs ni marques,
		A cui tan plagues messios
		Ni meins se pac d'avols baros.
V		Car qui pot e no vol valer,
		Com no s'esforsa de morir ?
	35	Deus, quar la mortz no·l denh' aucir,
		Per far enoi e desplazer !
		Et es trop lag d'onrat pages,
		Quam recolh las rendas e·ls ces :
		Cors poiritz ab cor vermenos,
	40	Viu ses grat de Deu e de nos.
VI		Bona dompna, Deu cug vezer,
		Quam lo vostre gen cors remir :
		E quar tan vos am ni·us dezir,
		Grans bes m'en deuri' escazer.
	45	Qu'aissi m'a vostr'amors conques
		E vencut e lassat e pres,
		Qu'ab tot lo segle, que meus fos,
		Me tenria paubres ses vos.
VII		Domna, quan vos vi remaner
	50	E m'avenc de vos a partir,
		Tan m'angoisseron li sospir
		Qu'ab pauc no m'avenc a cazer.
		Ai bela, doussa, franca res !
		Valha·m ab vos Deus e Merces !
	55	Retenetz mi e mas chansos,
		Sitot pez'al cortes gelos.
VIII		Domna, per vos am Narbones
		E Molinatz e Savartes
		E Castell'e·l bon rei N'Anfos,
	60	De cui sui cavaliers per vos.
IX		Emperaire dels Genoes
		Remanh et ai tal feu conques,
		Qu'es avinens e bels e bos,
		E sui amics dels borboillos.