Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,017 Auteur: Peire Vidal Genre: Canso Numero: XL

Deus en sia grazitz

I	1	Deus en sia grazitz,
		Que·l francs reis es garitz
		E sas e deleitos ;
		Per qu'eu cobre chansos
	5	Gaias e de gais sos,
		De que m'era gequitz
		Corrossos e marritz ;
		Mas la soa salutz
		Nos a totz ereubutz
	10	E tornat en joven
		Mon cor e mon talen.
II		Quar de bona razitz
		Es bos arbres eissitz,
		E·l fruitz es cars e bos
	15	E dous e saboros ;
		Et eu torn amoros
		Vas domnas e chauzitz
		Tan qu'enoj'als maritz,
		Per cui sui plus temsutz
	20	Que focs ni fers agutz ;
		Quar don me volh m'en pren,
		Qu'us no las mi defen.
III		Be·m tanh qu'eu si' arditz,
		Que tals domna m'es guitz
	25	Qu'es la genser qu'anc fos ;
		Qu'ab sas belas faissos
		Sei bel olh amoros
		An mains cors envazitz.
		Per que mos esperitz
	30	Es ab leis remazutz :
		Don mi sen revengutz
		De tot lo marrimen
		Qu'ai agut lonjamen.
IV		Jovens es mal balhitz
	35	E pretz d'onor trahitz
		Per colpa dels baros :
		Quar vezem los garsos
		Manens et orgolhos
		E·ls cortes escarnitz.
	40	E domnas trichairitz,
		Qu'an lor maritz perdutz,
		Renhan contra lor drutz
		Trop deschauzidamen
		Ab doble falhimen.
V	45	Ai ! bels cors gen bastitz.
		De totz bos aibs complitz,
		Domn', aissi·m rent a vos,
		Humils e voluntos
		E destreitz e coitos,
	50	Si com cel qu'es feritz
		D'amor al cor, que·m ditz,
		Que·m rend' a vos vencutz ;
		Doncs si no·m faitz ajutz,
		Mort auretz chauzimen
	55	E mi, don no·us er gen.
VI		Per flac rei apostitz
		Es bos regnes delitz,
		Quan planh sas messios
		E plora·ls autruis dos
	60	E fug solatz dels pros ;
		E reis, pos viu aunitz,
		Val meins que sebelitz.
		Mas eu sui car tengutz
		Dels melhors e crezutz
	65	Per la corteza gen,
		Quar contr'Amor no men.
VII		Per so'm sui en garnitz
		Contra·ls flacs acrupitz,
		Qu'ab mi n'es Aragos
	70	E Castel' e Leos,
		E·l valens reis N'Anfos
		Te·ls castels establitz,
		On pretz es gen servitz
		Et honratz e volgutz ;
	75	Per qu'eu dels abatutz,
		Flacs avars, cor de ven,
		Ai pauc de pensamen.
VIII		Qu'aissi com es arditz
		Leos plus que cabritz
	80	Et ors que bous cornutz
		E lops que bocs barbutz,
		Ai eu mais d'ardimen,
		Que tuit li recrezen.