Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 364,038 Auteur: Peire Vidal Genre: Canso Numero: XLV

Pos ubert ai mon ric tezaur

I	1	Pos ubert ai mon ric tezaur.
		Trairai n'un gai sonet novel,
		Que trametrai part Mongibel
		Al pro marques de Sardenha,
	5	Qu'ab joi viu et ab sen renha :
		Gen sap donar e retener
		E creis s'onor e son poder.
		E mos cars filhs, lo coms Enrics,
		A destruitz totz sos enemics
	10	Et als seus es tan ferms abrics
		Que qui·s vol ven e qui·s vol vai
		Ab meins de duptansa e d'esmai.
II		No volh sobras d'argen ni d'aur,
		Tant ai lo cor gai et isnel.
	15	E quan trob tornei ni cembel,
		Voluntiers desplec m'encenha
		E jonh e fatz d'asta lenha.
		E quan trob negun que m'esper,
		Viu o mort l'aven a cazer ;
	20	Qu'ab armas sui un pauc enics
		E non crei conselh ni castics,
		Ni no m'azaut de loncs prezics.
		Aissi·m viu et aissi m'estai
		Et am domna tal com eu sai.
III	25	Per seu tenh Vertfolh e Montlaur
		E servo·lh plus de cen castel
		E tres ciutatz ses tot revel ;
		Et a cor que pretz mantenha,
		Car ab cortezia renha,
	30	Que s'om houratz la vai vezer,
		Tan li fai e·l ditz de plazer,
		Qu'ai partir s'en vai sos amics.
		Et anc no·l plac engans ni trics,
		Ni lauzengiers ni gelos brics,
	35	Ans lor fai dir : « Estatz vos lai,
		Que re non avetz a far sai. »
IV		Color fresc' a ab cabelh saur
		Et anc non obret de pinsel,
		Mas Mongalhart e Daurabel
	40	Li platz qu'a sos obs retenha.
		Beljoc no ven ni empenha,
		E mi fai Montamat tener
		E Bon Repaus per melhs jazer,
		E per m'amor platz l'Ostals Rics
	45	Et es seus Esquiva-mendics,
		Et al marques non es destrics,
		Si·m dona Segur e Clavai
		Et a leis Cardon' e Monjai.
V		De Fois volh Laroqu' e Lavaur
	50	E·l bel palaitz e·l bel pradel
		E·l vergier on chanton l'auzel
		E Ben-aic e Melhs-m'en-venha.
		E si la comtessa·m denha,
		Seguramen posc remaner,
	55	Car complit seran mei voler ;
		Qu'eu no volh esser Lodoics
		Ni Manuels ni Frederics
		Ni de Narbona n'Aimerics :
		Car qui a so que plus li plai,
	60	De tot lo mon a·l melhs e·l mai.
VI		E Lans' aguda tenga·l Maur
		Ab dur os et ab negra pel,
		E negra noit e mal coutel
		E crebacor e compenha,
	65	E renhas ab que s'estrenha.
		Mal mati conques e mal ser,
		Quan det Ceva per pauc d'aver.
		Seus es Velais e Mons Antics,
		Malas meissos e voutz espics
	70	E cava dens e pois lombrics,
		E cordolor e fastic fai
		E mala mortz de vida·l trai
VII		Liatz a la coa d'un taur
		Degr' esser frustatz pel mazel
	75	D'Ast on vesti l'orre capel
		De tracion on s'emprenha
		L'eretje fals que no·s senha;
		Car hom peitz no pot dechazer
		Ni degeitz no pot meins valer.
	80	Que·l marques cui es Salonics
		Li ditz : « Per que morir no·t gics ? »
		Et es assatz plus rics que pics,
		E non pretz tot quant el retrai,
		Sa boca plena d'orre crai.
VIII	85	Al rei Peire, de cui es Vics,
		E Barsalon' e Mon-Judics,
		Man que meta totz sos afïcs
		En destruire·ls pagas de lai,
		Qu'eu destruirai totz cels de sai.
IX	90	Amiga, tan vos sui amics,
		Qu'ad autras en paresc enics
		E volh esser en vos Fenics,
		Qu'autre jamais non amarai
		Et en vos m'amor fenirai.