Jeanroy, Alfred. Les chansons de Jaufré Rudel. Paris: Champion, 1915

Code: 262,001 Auteur: Jaufre Rudel de Blaja Genre: Vers Numero: IV

Belhs m'es l'estius e·l temps floritz

I	1	Belhs m'es l'estius e·l temps floritz
		Quan l'auzelh chanton sotz la flor,
		Mas ieu tenc l'ivern per gensor
		Quar mais de joy m'i es cobitz,
	5	Et quant hom ve son jauzimen
		Es ben razos e d'avinen
		Qu'om sia plus coyndes e guays.
II		Er ai ieu joy e suy jauzitz
		E restauratz en ma valor,
	10	E non iray jamai alhor
		Ni non querrai autrui conquistz,
		Qu'eras say ben az escien
		Que selh es savis qui aten
		E selh es fols qui trop s'irays.
III	15	Lonc temps ai estat en dolor
		Et de tot mon afar marritz,
		Qu'anc no fuy tant fort endurmitz
		Que no·m rissides de paor.
		Mas aras vey e pes e sen
	20	Que passat ai aquelh turmen,
		E non hi vuelh tornar ja mays.
IV		Mout mi tenon a gran honor
		Tug silh cui ieu n'ey obeditz
		Quar a mon joi suy revertitz :
	25	E laus en lieys e Dieu e lor,
		Qu'er an lur grat e lur prezen,
		E, que qu'ieu m'en anes dizen,
		Lai mi remanh e lay m'apays.
V		Mas per so m'en sui encharzitz,
	30	Ja no·n creyrai lauzenjador,
		Qu'anc no fuy tan lunhatz d'amor
		Qu'er no·n sia sals e gueritz.
		Plus savis hom de mi mespren,
		Per qu'ieu sai ben az escien
	35	Qu'anc fïn'amors home non trays.
VI		Mielhs mi fora jazer vestitz
		Que despolhatz sotz cobertor
		E puesc vos en traire auctor
		La nueyt quant ieu fuy assalhitz.
	40	Totz temps n'aurai mon cor dolen,
		Quar aissi·s n'aneron rizen,
		Qu'enquer en sospir e·n pantays.
VII		Mais d'una re soi en error
		E·n estai mos cors esbaïtz
	45	Que tot can lo fraire·m desditz
		Aug autrejar a la seror ;
		E nulhs hom non a tan de sen,
		Que puesc' aver cominalmen.
		Que ves calque part non biais.
VIII	50	El mes d'abril e de pascor
		Can l'auzel movon lur dous critz
		Adoncs vuelh mos chans si' auzitz,
		Et aprendetz lo, chantador !
		E sapchatz tug cominalmen
	55	Qu'ie·m tenc per ric e per manen
		Car soi descargatz de fol fais.