Jeanroy, Alfred. Les chansons de Jaufré Rudel. Paris: Champion, 1915

Code: 262,003 Auteur: Jaufre Rudel de Blaja Genre: Vers Numero: VI

No sap chantar qui so non di

I	1	No sap chantar qui so non di,
		Ni vers trobar qui motz no fa,
		Ni conois de rima co·s va
		Si razo non enten en si.
	5	Mas lo mieus chans comens' aissi
		Com plus l'auziretz, mais valra, a a.
II		Nuils hom no·s meravill de mi
		S'ieu am so que ja no·m veira,
		Que·l cor joi d'autr'amor non ha
	10	Mas de cela qu'ieu anc no vi,
		Ni per nuill joi aitan no ri,
		E no sai quals bes m'en venra, a a.
III		Colps de joi me fer, que m'ausi,
		Et ponha d'amor que·m sostra
	15	La carn, don lo cors magrira ;
		Et anc mais tan greu no·m feri,
		Ni per nuill colp tan no langui,
		Quar no cove ni no s'esca, a a.
IV		Anc tan suau no m'adurmi
	20	Mos esperitz tost no fos la,
		Ni tan d'ira non ac de sa
		Mos cors ades no fos aqui :
		E quan mi resveill al mati
		Totz mos bos sabers mi desva, a a.
V	25	Ben sai c'anc de lei no·m jauzi,
		Ni ja de mi no·s jauzira,
		Ni per son amic no·m tenra
		Ni coven no·m fara de si ;
		Anc no·m dis ver ni no·m menti
	30	E no sai si ja s'o fara, a a.
VI		Bos es lo vers, qu'anc no·i falhi,
		Et tot so que·i es ben esta ;
		E sel que de mi l'apenra
		Gart se no·l franha ni·l pessi ;
	35	Car si l'auran en Caersi
		En Bertrans e·l coms en Tolza, a a.
VII		Bos es lo vers, e faran hi
		Calque re don hom chantara, a a.