Jeanroy, Alfred. Les chansons de Guillaume IX duc d'Aquitaine (1071-1127). Paris: Champion, 1913

Code: 183,003 Auteur: Guilhem de Peitieus Genre: Vers Numero: I

Companho, faray un vers covinen

I	1	Companho, faray un vers    …covinen :
		Et aura·i mais de foudatz    no·y a de sen,
		Et er totz mesclatz d'amor    e de joy e de joven.
II		E tenguatz lo per vilan    qui no l'enten
	5	O dins son cor voluntiers    [qui] non l'apren ;
		Greu partir si fa d'amor    qui la trob'a son talen.
III		Dos cavalhs ai a ma selha    ben e gen ;
		Bon son e adreg per armas    e valen ;
		Mas no·ls puesc amdos tener    que l'us l'autre non cossen.
IV	10	Si·ls pogues adomesjar    a mon talen,
		Ja no volgra alhors mudar    mon guarnimen.
		Que miels for' encavalguatz    de nuill [autr'] ome viven.
V		Launs fo dels montanhiers    lo plus corren ;
		Mas aitan fer' estranhez'    ha longuamen,
	15	Et es tan fers e salvatges    que del bailar si defen.
VI		L'autre fo noyritz sa jus,    part Cofolen,
		Et anc no·n vis bellazor,    mon escien ;
		Aquest non er ja camjatz    ni per aur ni per argen.
VII		Qu'ie·l doney a son senhor    polin payssen ;
	20	Pero si·m retinc ieu tan    de covenen
		Que s'el lo teni' un an    qu'ieu lo tengues mais de cen.
VIII		Cavallier, datz mi cosselh    d'un pessamen ;
		Anc mais no fuy issarratz    de cauzimen :
		Ges non sai ab qual mi tengua    de N'Agnes o de N'Arsen.
IX	25	De Gimel ai lo castel    e·l mandamen,
		E per Niol fauc ergueill    a tota gen,
		C'ambedui me son jurat    e plevit per sagramen.