Jeanroy, Alfred. Les chansons de Guillaume IX duc d'Aquitaine (1071-1127). Paris: Champion, 1913

Code: 183,007 Auteur: Guilhem de Peitieus Genre: Vers Numero: IV

Farai un vers de dreyt nien

I	1	Farai un vers de dreyt nien :
		Non er de mi ni d'autra gen,
		Non er d'amor ni de joven,
		Ni de ren au,
	5	Qu'enans fo trobatz en durmen
		Sobre chevau.
II		No sai en qual hora·m fuy natz :
		No suy alegres ni iratz,
		No suy estrayns ni sui privatz,
	10	Ni no·n puesc au,
		Qu'enaissi fuy de nueitz fadatz,
		Sobr' un pueg au.
III		No sai qu'ora·m suy endurmitz
		Ni quora·m velh, s'om no m'o ditz.
	15	Per pauc no m'es lo cor partitz
		D'un dol corau ;
		E no m'o pretz una soritz,
		Per sanh Marsau !
IV		Malautz suy e cre mi murir,
	20	E ren no·n sai mas quan n'aug dir ;
		Metge querrai al mieu albir,
		E no sai cau ;
		Bos metges er si·m pot guerir.
		Mas non, si amau.
V	25	Amigu' ai ieu, no sai qui s'es,
		Qu'anc non la vi, si m'ajut fes ;
		Ni·m fes que·m plassa ni que·m pes,
		Ni no m'en cau,
		Qu'anc non ac Norman ni Frances
	30	Dins mon ostau.
VI		Anc non la vi et am la fort,
		Anc no n'aic dreyt ni no·m fes tort ;
		Quan non la vey, be m'en deport,
		No·m pretz un jau,
	35	Qu'ie·n sai gensor e bellazor,
		E que mais vau.
VII		Fag ai lo vers, no say de cuy ;
		E trametrai lo a selhuy
		Que lo·m trametra per autruy
	40	Lay ves Anjau,
		Que·m tramezes del sieu estuy
		La contraclau.