Jeanroy, Alfred. Les chansons de Guillaume IX duc d'Aquitaine (1071-1127). Paris: Champion, 1913

Code: 183,002 Auteur: Guilhem de Peitieus Genre: Vers Numero: VI

Ben vuelh que sapchon li pluzor

I	1	Ben vuelh que sapchon li pluzor
		D'est vers si's de bona color,
		Qu'ieu ai trag de mon obrador :
		Qu'ieuport d'ayselh mestier la flor,
	5	Et es vertatz,
		E puesc ne traire·l vers auctor
		Quant er lassatz.
II		Ieu conosc ben sen e folhor,
		E conosc anta et honor,
	10	Et ai ardimen e paor ;
		E si·m partetz un juec d'amor
		No suy tan fatz
		No·n sapcha triar lo melhor
		D'entre·ls malvatz.
III	15	Ieu conosc ben selh qui be·m di,
		E selh qui·m vol mal atressi,
		E conosc ben selhuy qui·m ri,
		E si·l pro s'azauton de mi,
		Conosc assatz
	20	Qu'atressi dey voler lor fi
		E lor solatz.
IV		Mas ben aya selh qui·m noyri,
		Que tan bo mestier m'eschari
		Que anc a negu non falhi ;
	25	Qu'ieu sai jogar sobre coyssi
		A totz tocatz ;
		Mais en say de nulh mo vezi,
		Qual que·m vejatz.
V		Dieu en lau e Sanh Jolia :
	30	Tant ai apres del juec doussa
		Que sobre totz n'ai bona ma.
		E selh qui cosselh mi querra
		Non l'er vedatz,
		Ni us de mi non tornara
	35	Descosselhatz.
VI		Qu'ieu ai nom « maiestre certa » :
		Ja m'amigu' anueg no m'aura
		Que no·m vuelh' aver l'endema ;
		Qu'ieu suy d'aquest mestier, so·m va,
	40	Tan ensenhatz
		Que be·n sai guazanhar mon pa
		En totz mercatz.
VII		Pero no m'auzetz tan guabier
		Qu'ieu non fos rahusatz l'autr'ier.
	45	Que jogav'a un joc grossier,
		Que·m fon trop bos al cap primier
		Tro fuy 'ntaulatz ;
		Quan guardiey, no m'ac plus mestier,
		Si·m fon camjatz.
VIII	50	Mas elha·m dis un reprovier :
		« Don, vostre dat son menudier,
		Et ieu revit vos a doblier. »
		Fis m'ieu : « Qui·m dava Monpeslier,
		Non er laissatz. »
	55	E leviey un pauc son taulier,
		Ab ams mos bratz.
IX		Et quant l’aic levat lo taulier,
		Empeis los datz,
		E·ill duy foron cairavallier
	60	E·l terz plombatz.
X		E fi·ls fort ferir al taulier,
		E fon joguatz.