Jeanroy, Alfred. Les chansons de Guillaume IX duc d'Aquitaine (1071-1127). Paris: Champion, 1913

Code: 183,006 Auteur: Guilhem de Peitieus Genre: Canso Numero: VIII

Farai chansoneta nueva

I	1	Farai chansoneta nueva
		Ans que vent ni gel ni plueva ;
		Ma dona m'assai' e·m prueva,
		Quossi de qual guiza l'am ;
	5	E ja per plag que m'en mueva
		No·m solvera de son liam.
II		Qu'ans mi rent a lievs e·m liure,
		Qu'en sa carta·m pot escriure.
		E no m'en tengatz per yure
	10	S'ieu ma bona dompna am,
		Quar senes lieys non puesc viure,
		Tant ai pres de s'amor gran fam.
III		Que plus etz blanca qu'evori,
		Per qu'ieu autra non azori.
	15	Si·m breu non ai ajutori,
		Cum ma bona dompna m'am,
		Morrai, pel cap sanh Gregori,
		Si no·m bayz' en cambr' o sotz ram.
IV		Qual pro y auretz, dompna conja,
	20	Si vostr' amors mi deslonja ?
		Par queus vulhatz metre monja.
		E sapchatz, quar tan vos am,
		Tem que la dolors me ponja,
		Si no·m faitz dreg dels tortz qu'ieus clam.
V	25	Qual pro y auretz, s'ieu m'enclostre
		E no·m retenetz per vostre ?
		Totz lo joys del mon es nostre,
		Dompna, s'amduy nos amam.
		Lay al mieu amic Daurostre
	30	Dic e man que chan e [no] bram.
VI		Per aquesta fri e tremble,
		Quar de tan bon' amor l'am ;
		Qu'anc no cug qu'en nasques semble
		En semblan del gran linh n'Adam.