Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Introduction
* Vocabulaire

* Présentation
* Appareil critique
* Traductions

Jeanroy, Alfred. Les chansons de Guillaume IX duc d'Aquitaine (1071-1127). Paris: Champion, 1913

Code: 183,001 Auteur: Guilhem de Peitieus Genre: Vers Numero: X

Ab la dolchor del temps novel

I 1 Ab la dolchor del temps novel
    Foillo li bosc, e li aucel
    Chanton chascus en lor lati
    Segon lo vers del novel chan ;
  5 Adonc esta ben c'om s'aisi
    D'acho don hom a plus talan.
     
II   De lai don plus m'es bon e bel
    Non vei mesager ni sagel,
    Per que mos cors non dorm ni ri,
  10 Ni no m'aus traire adenan,
    Tro qe sacha ben de la fi
    S'el' es aissi com eu deman.
     
III   La nostr' amor vai enaissi
    Com la branca de l'albespi
  15 Qu'esta sobre l'arbre en treman,
    La nuoit, a la ploja ez al gel,
    Tro l'endeman, que·l sols s'espan
    Pel las fueillas verz e·l ramel.
     
IV   Enquer me menbra d'un mati
  20 Que nos fezem de guerra fi,
    E que·m donet un don tan gran,
    Sa drudari' e son anel :
    Enquer me lais Dieus viure tan
    C'aja mas manz soz so mantel !
     
V 25 Qu'eu non ai soing d'estraing lati
    Que·m parta de mon Bon Vezi,
    Qu'eu sai de paraulas com van
    Ab un breu sermon que s'espel,
    Que tal se van d'amor gaban,
  30 Nos n'avem la pessa e·l coutel.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI