Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 021,002 Auteur: Amanieu de la Broqueria Genre: Canso Numero: VI

Quan reverdion li conderc

I	1	Quan reverdeion li conderc,
		e la lauzeta puei' al mont,
		e li auzelet, dui e dui,
		en lur lati, segon que·s es,
	5	fan retendir la calmeilla
		pel fin ioi qu'ins en lor s'es mes.
II		Per ma enemigua m'esperc,
		que·m te marrit e deziron,
		per so quar tostemps si·m defui.
	10	ai! si ia l'en penra merces?
		qu'ieu no sai consi·s conseilla,
		quar de leis no ve negus bes.
III		So fan lauzengier entenerc,
		per cui iovens bais' e confon,
	15	per lur fals'amor, e destrui,
		e son fait d'aiso plaides,
		don lo maritz se coreilla,
		. . . gran tort, c'anc no fo res.
IV		Estra lur grat cre iois m'alberc,
	20	que·m tenra baut e iauzion;
		e si·m iauzis, iauzirei lui —
		mas, pel senhor qu'en crotz fo mes,
		sa colors fresqu'e vermeilla
		camia mon sen, tal ora es.
V	25	Molt n'am entresenh et auberc
		per leis, mais c'autra re del mon,
		donar e deport e desdui,
		cortz e guerras e gens conres;
		e qui d'aiso s'apareilla
	30	tost deu aver sidons conques.
VI		Fe que dei al portal Saint Loberc,
		mal fara, s'ap si no·m rescon
		en tal luec on siam abdui;
		e sia fait ab genhs cortes;
	35	c'aisi pueia iois en treilla,
		quan de dos amicx es empres.
VII		Sel que ditz qu'ieu ab leis re perc,
		me fai sospirar de prion,
		qu'ieu l'am finamen ses autrui,
	40	e c'ela d'aiso fiera m'es,
		don li hueill e·l cors si mueilla,
		de fol joc me soi entremes.
VIII		Pren Porta-ioia d'Engolmes
		volgra·n Amaneus Aureilla
	45	lo vers si dons aver trames,
		o pren Paire de Bordeles.