Bertoni, Giulio. I trovatori minori di Genova. Dresden: Gesellschaft für Romanische Literatur, 1903

Code: 101,008a=433,001 Auteur: Bonifaci Calvo , Luquet Gatelus Genre: Tenso Numero: XII

Luchetz, seus platz mais amar finamen

I	1	Luchetz, seus platz mais amar finamen
		vostra domna et esser desamatz
		tostemps per leis on plus finz li siatz,
		q'aver ab gienh e ab galiamen
	5	s'amor conqes e ab tota falsura,
		sapchal per vos: o s'etz mais voluntos
		d'aver s'amor conqes ab tracios
		qe de languir finz per sa desmesura?
II		Bonifaci, desegal partimen
	10	sabes partir, q'enianz e leiautatz
		nos fan ensems ni partir nols degratz,
		al mieu semblan, enaissi engalmen:
		pero eu prenc amar senes frachura
		e sens tot faillimen, con finz e bos,
	15	el ioi d'enian lais als fals amoros,
		qe fan semblan d'aizo don non an cura.
III		Luchetz, aqel qe fai parer fegnen
		q'es amics douz e amics afinatz,
		per tal q'amdui n'aian ioi e solatz,
	20	sab mais qe cel q'a ben amar s'empren
		ab tal parer qe merces e mesura
		faill'en si donz, qan non sia razos,
		e q'el tostemps dei'esser rancuros
		de leis, qar lo desam senes drechura.
IV	25	Bonifaci, fìnz amanz iauzimen
		non pot penre d'enianz ni de baratz:
		et es nientz zo q'aves razonatz,
		q'om d'enjanar sa domna fassa sen;
		qe fiz amics, pueis finamen s'atura,
	30	non deu voler, si tot ser em perdos,
		trair si donz; ni l'es iois saboros,
		si nol conqer ses tota forfachura.
V		Cel qe sa donn'enjana, conoissen
		q'il en reman iauzenz et el pagatz,
	35	fai qe savis, e cel es fols proatz
		c'am, se languir voi aman leialmen;
		car dreitz non manda ni consen natura
		q'om serv'ab desesper, Luchetz, e vos,
		s'o volretz far, no i seretz poderos,
	40	mentr'aiatz sen ni conoiscenza pura.
VI		Cel q'enjana sa donn’a escien
		mier piegz de mort, Bonifaz', el percatz
		li val fort pauc, qar non pot venir gratz
		d'amor en cor, qe non am coralmen;
	45	doncs per nien se damn'e si peiura
		q'el s'enjana, si tot sec son vol blos,
		el finz sivals es de ric ioi ioios,
		car si sent finz e leials senz rancura.
VII		Aqel leials, don nos avem conten,
	50	Luchetz, es fols, s'el non es mais iratz
		qe iauzenz; qar non es maier foudatz
		con amar fort en luec desavinen;
		car hom non pot aver bonaventura
		ni n'es lauzatz, e cel es tengutz pros,
	55	qal qe sia, q'ab semblan cabalos
		conqier dona humil o brav'e dura.
VIII		Totz iois dechai e torn'en gran rancura,
		Bonifaci, qant noi soste razos;
		per qel fals iois, don vos es volontos,
	60	non pot plazer a ma voluntat pura.
IX		Mantenen tort e zo don non ai cura,
		vos ai vencut, Luchetz, don sui ioios;
		qar ai mostrat q'eu sai tan plus de vos,
		c'ab tort conten miels qe vos ab drechura.