Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 069,002 Auteur: Bernart de Tot lo mon Genre: Plazer Numero: XXI

Lo plazer qu'als plazens plai

I	1	Lo plazers qu'als plazens plai
		me plai, on que·m an;
		donc plazers plazens dirai,
		e non plaideyan,
	5	dels pros plazens, si m'escoutatz,
		a cuy platz proeza e solatz,
		e plai lor quan vezon far be,
		quar de plazers plazens son ple.
II		Plazers vuelh e plazers ay,
	10	plazens vau cerchan;
		plazers n'iey, plazers n'auray,
		los plazens deman.
		res tan cum bos plazers no·m platz,
		et a me play qu'als plazens platz;
	15	e plass'a Dieu, si cum yeu·l cre,
		plass'als plazens et elh a me.
III		Pros plazens on trobaray?
		mout n'ai gran talan;
		en Gascuenha·n say e say
	20	ab fin pretz prezan;
		pero pels pros es plus prezatz
		lo coms de Cumenges, sapchatz.
		(de bonas gens vuelh dire be)
		e d'Astarac, que pretz mante.
IV	25	Be vuel dir e ben aurai,
		de ben ai talan;
		e mas ben vuelh, ben auray,
		be·m don dieus tot l'an;
		e ben ag'ieu e ben ajatz
	30	e ben auretz, si ben sercatz;
		qu'en so qu'om serca, esdeve
		a las horas, segon qu'ieu cre.
V		Riqueza a rica lay-
		-l coms Enricx; ric an
	35	li don dieus que rics faitz fai
		ve·us riqueza gran!
		be volgra, fos sieus lo regnatz,
		e del rey fos lo principatz
		sol vint ans, e pueys cobres le,
	40	si·l reys Enrics no fezes be.
VI		A donzellas me suy donatz
		per far e dir lur voluntatz,
		a lor lauzar, e dic per que:
		que hom no me·n repren de re.
VII	45	Senh'en coms, dieus sal vos e . . . .
		. . . . . . , que·us vo . . . . . .