Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 071,003 Auteur: Bernart de Venzac Genre: Vers Numero: XXIV

Pus vey lo temps fer frevoluc

I	1	Pus vey lo temps fer frevoluc,
		que·ns mostra mala companha
		e salvatga et estranha
		de gels e d’auras e de vens,
	5	farai un vers qu’er covinens
		ab motz verays,
		et er als plus savis pantays
		et als non-savis bistensa.
II		Silh que mais volon chantezuc,
	10	lur entendres pauc gazanha;
		qui no·s pessa tost barguanha,
		bons vers, q’us no·n es conoyssens;
		quar vers ses verba es niens;
		e volon mais
	15	li folh, en cuy saber no nays,
		buf-baf q’una sapiensa.
III		No·m puesc pessar on sol m’aluc,
		que ves totas partz vey fanha,
		ni conosc que bes remanha,
	20	qui·l ditz entre malvaizas gens;
		quar de peccat creys lur semens
		e fan lur fays:
		l’us pren boscx e plas, e quer mays,
		que nueg e iorn no s’alensa.
IV	25	Quan lo vis mont’al folh el suc,
		luxuria en luy si banha,
		e fai li far don gavanha
		lialtat e creys marrimens.
		pueys rema·l crims mals e cozens
	30	sobre·ls savays,
		quant a·l pel entre·l col e·l cays,
		que pes totz temps cuelh, qui·lh sensa.
V		Ergulhos no ve son trabuc
		plus que fai son colp la canha,
	35	qu’enquer qu’om las dens li franha,
		pueys del fugir non es falhens.
		orguelh si montas, plus dissens,
		si ben yest guays;
		et apres, voian lo carcays,
	40	lo „par-belh‘‘ tot a valensa.
VI		Maritz drutz, qu’autruy con bezuc
		del sieu, fai lo trieu d’Espanha,
		et es li·n avols mesclanha
		si per un colp ne pren trezens;
	45	qu’e luy suefre e sufrens,
		si nos n’irays;
		ben sembla, que pels autruys bays
		fassa dels sieus eys sufrensa.
VII		Escas no vol qu’om lo pessuc,
	50	tan tem qu’avers li sofranha,
		ni no vol qu’om ia re·l tanha
		ni·l sia cozis ni parens;
		sapchatz quaz autruy es sirvens
		entro que·l lays;
	55	pueys no·l sia fer, qui lo·n pays
		ab cullier coa-fallensa.
VIII		Lo vers recipia·l coms Uc
		en sa cort ab sa companha;
		e se y a mot que no y tanha,
	60	mova lo·n, e prec que lo·y gens.
		e plassa dieu que·l sieus iovens
		vuelha huey mais
		ben e patz, e totz selhs abays
		que·l mouran guerra ni tensa.
IX	65	Del bisb’e d’elh sia iauzens
		Rodes huey mays,
		e tornon en patz lor carays,
		si que lo bes lo mal vensa.