Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 256,001 Auteur: Izarn Marques Genre: Canso Numero: LXXV

S'ieu fos ta savis en amar

I	1	S'ieu fos ta savis en amar
		quo sson en autres faitz cortes,
		no·m fora tan aut endemes
		ni de tan valen dompneyar.
	5	pero vers es que mais en val mos chans
		e mos sabers per un cent e mil tans,
		quar grieu pot hom de bas loc bos dictatz
		far, per que·m suy tan aut enamoratz.
II		A! cum saup las · V · claus emblar
	10	dels ·V· sens, don naysson totz bes,
		amors selh iorn, que·m fon promes,
		qu'ieu vi lieys qu'a beutatz ses par!
		et ab tot so, qui ditz qu'amors enjans
		fa, dic que men, que·ls destricx e·ls afans
	15	que don'amors, son ricx plazers prezatz;
		ver dic d'amor, per cuy suy foriuiatz.
III		Er diran nesci en parlar
		que so qu'ieu ai dig, non es res,
		mas yeu ai tan d'amor apres
	20	que·m sai be de trastotz gardar,
		que us no sap mon cor ni mos talans,
		qu'estiers non es en est mon nulhs amans
		leyals ni fis, si tan non es celatz
		que gart sidons e si d'esser blasmatz.
IV	25	Per so m'a fait mos sens luynhar
		d'ilh, que blasmes no li·n vengues,
		dos ans, que·m semblan vint e tres,
		don me pot per dreg encolpar,
		quar tant estau del sieu cors, qu'es prezans
	30	adregz belhs bos gays cortes benestans;
		mas per so fort no·n dey esser reptatz,
		quar per s'onor me suy de lieys lunhatz.
V		Fort volria ves luy tornar,
		que·l cor e·l sen e·l gienh m'a pres
	35	de mi, qu'ilh los a, qu'ieu non ges,
		ni ia nulh temps no·ls vuelh cobrar;
		ans qui·s vuelha, sia dieus sopleyans,
		qu'ieu sopley lieis mas iuns merce clamans,
		e·m suy aissi a lieys del tot donatz
	40	que ges non l'aus tornar ses sos mandatz.
VI		Al rey n'Anfos, que coronar
		sap si d'onor, e y vieu merces,
		et a·l pretz del mon trastot pres,
		e val mays c'om non pot pessar,
	45	do ma chanso, car sos sens es tan grans
		qu'el es larcx pros francx humils gen parlans
		tan que no·l val nulhs reys que sia natz,
		s'avia·l pretz de totz los traspassatz.
VII		Del rey n'Anfos castella es vertatz
	50	tot quan n'ay dig, e mans bes assazatz.