Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 082,018 Auteur: Bertran Carbonel Genre: Sirventes Numero: XXXVI

Un sirventes de vil razo

I	1	Un sirventes de vil razo
		fas e de vils ditz eyssamen,
		e ia tan no·l farai vilmen
		que pus vils ses comparazo
	5	er ·X· tans le vils, on que sia.
		vils? — oc, ples de tota bauzia,
		e s'ie·l fatz vil, aissi·s cove,
		car vilmens le vils se capte.
II		Qu'el e·l esgart ab la faisso
	10	e·l dig e fag seran gueren
		que negus pus deslialmen
		non renha, e iuraria o.
		e qui vol melhor guerentia,
		·M· en Marselha·n trobaria
	15	qu'o sabon, sol deman per que
		playdey' aquestz ples de no-fe.
III		Ja dieus de fals home no·m do
		pacha, ni d'aquest maiormen.
		qu'ieu l'ay vist far sagramen
	20	falsamen, si dieus me perdo;
		e si clam d'aisso far volia,
		leugeyra pena·n portaria,
		car qui non proa no val re,
		e sel que proa, dreg mante.
IV	25	Periurs, esgarda la sazo
		e·l temps, et an te costrenhen,
		vielhs yest . . . . . . . . . . .
		si, las, met y t'entensio!
		mortz yest vieus, mas s'aisi·n partia
	30	t'arma, eternals mortz seria;
		doncx esguarda e pensa be
		com amas dieus e·ls tieus e te!
V		Cascus me tenra per breto
		e dira qu'ieu chan cluzamen; —
	35	no fas, que leng' ay entenden,
		que a Paris non a garso,
		a Gayeta ni a Pavia,
		que sapcha un pauc de clersia,
		que be no sapcha que ditz ·P·
	40	ponchat, et en apres ·I · G·
VI		Ar l'ay nomnat, qui m'entendia;
		pero ·G· motz noms signifia;
		mas nostre drapier sabon be
		cals es aquest ples de non-fe.
VII	45	Dieus prec que de gran mal l'estre,
		c'aitals estrena li perte.