Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 156,003 Auteur: Falquet de Romans Genre: Canso Numero: XLIV

Cantar vuoill amorosamen

I	1	Cantar vuoill amorosamen,
		si tut no vei fuogllia ni flor,
		ce frec no·m fai ni gels paor,
		tant ai lo cor gai e gausen;
	5	e autressi·m plai alegrars
		d'ivern com d'estiu o cantars,
		puois per servidor mi rete
		tals c'es conplida de tut be.
II		Anc dompna non m'er tan plaisen
	10	ni ab tan entera valor;
		et a be plus fresca color
		ce rosa ni flors d'angilen,
		bella bocha, bels uogltç e nars,
		et estai li tant gien parlars
	15	c'a nuls tenps no uos dira re
		mas onors e plazers e be.
III		E sapciatç c'anc plus coralmen
		non amet Floris Blanciflor
		c'ieu am lieis ce·m val e·m socor;
	20	e no son privatç d'avoll gen;
		gia mi no plai aprivasars
		abm croi ni trop consigliars
		ab lausengier, car ci los cre
		pro fai de mall e pauc de be.
IV	25	Ogonet, porta·m per present
		ma canson al emperador,
		c'el sap ben triar lo megllior,
		tant a de valor e de sen;
		e par ben als sieus rics afars
	30	s'el s'es pros, c'anc no fo sos pars;
		. . . . . . . . . . . . . . . . . . . .
		. . . . . . . . . . . . . . . . . .
V		Emperaire, bel segner cars,
		no cre sia plus francs bars
	35	del conte de Caret, qe mante
		pretç e fai tuz giortç mais de be.