Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 156,005 Auteur: Falquet de Romans Genre: Canso Numero: XLV

Jeu no mudaria

I	1	Jeu no mudaria
		q'un vers novel no comens
		pel ioy de m'amia,
		qu'es pros e conhd'e valens.
	5	ab lieys estai, on que sia,
		totz mos sens;
		entendens
		en suy e guays e iauzens.
II		Non a guair' enquera
	10	q'us orguelhs m'avia mort;
		mas trobat n'ay era
		ric cosselh, que·m n'a estort
		e trag del peril ont era,
		a dreg port;
	15	be·m vai fort,
		qu'ieu ri e·m chant e·m deport.
III		Erguelh ni pezansa
		non ay, s'aver non o dey
		quar tan luenh mi lansa
	20	la bella a cuy m'autrey,
		quar amistat ni semblansa
		qu'ela fey
		endreg mey,
		non es qu'al cor no·m estey.
IV	25	Si non quan remire
		de midons son belh cors gen,
		de lieys mi cossire
		e·n estau en pessamen,
		que ves son pays me vire
	30	en durmen,
		contra·l ven,
		tam bo mi sap, quant ieu·l sen.
V		El sobran estatge,
		lai on sos gens cors fis es,
	35	ai mes mon coratge;
		de sai li·n refier merces;
		be m'o tengra a folhatge,
		qui·m disses
		qu'aitals bes
	40	esdevenir me·n pogues.
VI		Aras vay ta via,
		que tot mon cor saps, chansos!
		mas petit m'embria
		quar no lai anam abdos,
	45	lai on mos cors diria
		qu'a rescos
		ab lieys fos
		lo sieus amicx fis e bos.
VII		Comtessa francha e corteza,
	50	largua e pros,
		mas chansos
		fauc, e sian lai ab vos.