Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 167,010 Auteur: Gaucelm Faidit Genre: Canso Numero: XLVII

Ar es lo montç vermelltç e vertç

I	1	Ar es lo montç vermelltç e vertç
		e de mantas colors cubertç,
		he rema·l brun' aura negra,
		e·l ausel deseron lur becs,
	5	per c'ieu ai talent che desplec
		tal un vers ce far no pogra
		mentre ce·l desturbiers me tenc.
II		Mais era m'esmend' e·m endertç
		los maltraitç c'avia sufertç,
	10	non gies cill ce far o degra,
		mas autra ce·m trais fors los decs,
		can vic lo gran affan qui·m crec,
		don giamais mos cors no·s mogra,
		si·l fins giois no fos ce·m revenc
III	15	De midons, qi m'es si aut dertç
		per c'ieu puosc e dei eser certç
		qu'ill a me no·s eschasegra;
		mais, pos que·l platç, eu no ssoi pecs,
		c'a ssom plasser ab lieis m'aplec;
	20	e l'autra, c'ades mi nogra,
		torne se·n ab aquo q . . . . . . venc:
IV		Ab son engan, qui's vairtç e vertç,
		e ab sos bels ditç fais cubertç
		se·n torn, e ab s'amor negra,
	25	c'a doas lengas e dus becs;
		mais lieis non cal qui's qu'eu desplec
		lo ver del mal q'ieu dir pogra,
		si·m volges, pel dan en que·m tenc.
V		No·s tainh, quil bela m'o endertç;
	30	e ssitot eu ai lai sufertç
		los dantç que sufrir non degra,
		tuogll me·n, e met ab leis mos decs
		cui grasisc c'ar mi det e·m crec,
		che gia per autra no mogra
	35	mon cor del mal c'a me revenc.
VI		Per so dic c'a bona fe·m dertç
		ma dompna, e ssoi ne ben certç. —
		mais dic ce no·m escasegra
		neus q'eu en penses? — soi ben pecs. —
	40	per ce? — car dic c'am lieis m'aplec. —
		mi trai doncs? — oc. — noca·m nogra
		ver dir al fi gioi qui me venc. —
VII		Si fera, que·l giois es trop verç,
		e gia·l dirs no·n fura suferç
	45	per lieis, e non s'escasegra,
		que d'uns n'i a ab trenchans becs,
		tals c'anc giois ab lur vol non crec,
		ans si poges, cacs mi nogra
		ab lieis de cui mi meteis tenc.
VIII	50	Don Deportç, lieis mon ver desplec
		denant n'Agout, de cui mogra,
		si·l giois non fos ce sai mi venc.