Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 202,003 Auteur: Guilhem Ademar Genre: Canso Numero: LI

Chantan dissera, si pogues

I	1	Chantan dissera, si pogues,
		el temps esquiu, mal et engres
		tal ren qu'azenan mi valgues,
		quan l'autre culhiran las mes;
	5	qu'ieu de mon laborag' aten
		un frug d'amor dousset e car,
		e pueys trobaretz greu mon par,
		si per aventura s'avenc.
II		Viatz aurai estat plaides
	10	quatr'ans de na Bona-nasques
		quon hom faiditz de son paes
		per forfag don me . . . . . . .
		. . . . . jorns mon . . . . . . .
		. . . . . . . tragz del lo . . . .
	15	. . . . . . . la puesc re . . . .
		. . . . . . . . . cors non t . . .
III		Dieus sa . . . . . . . . . . . . .
		que negu . . . . . . . . . . . . .
		quanc pu . . . . . . . . . . ques
	20	que . . . . . . . . . . . . lonhes
		e sapchatz qu'esdeve soven,
		quan cug dir razon d'autr' afar,
		qu'el mieg m'oblit si del parlar,
		no sai on m'o lays ni m'o prenc.
IV	25	E qui creira que bona fes
		merceyan no m'i plaideyes
		. . . . . . . . . . . . . . . . . .
		qu'anc tan no·m cugiei que l'ames;
		e donc si merces no li·n pren,
	30	qui·s deura en dompna fizar?
		qu'anc pueys no vuelc·en als ponhar
		ni d'autr'amor iauzir no·m fenc,
V		Senher dieus, qui son enten mes
		prims en amor, quar si negues
	35	o qualsque cauza l'avengues
		per qu'autra gens se·n chasties,
		ieu per amor art e 'scompren;
		e non sai que dir ni que far,
		q'us paucs que dic, m'a tout manjar
	40	et a pauc de set non estenc.
VI		Dieus prec e tot quan de ben es,
		que mueyr' onguan mal descofes
		selh hom quez anc lauzengua y mes
		entre nos, per qu'ilh m'azires,
	45	qu'ieu ses lieys non ai guerimen,
		ni puesc mais ma vid' alonguar,
		si'm breu no·m don' aquel bayzar
		qu'e mon cor abras et estrenc.
VII		S'ab autra dompna far saupes
	50	tal plag, que elh'ab si·m colgues,
		doncs pogr'ieu dir qu'en Albiges,
		quan sai vinc, lo mal cor laysses;
		e que·n hiria als dizen —
		que no·m dey per mieu razonar,
	55	quar sieus suy per vendr'e per dar, —
		cum bayles, qu'ieu de lieys mi tenc?
VIII		Francs cors gentils, guays e cortes,
		belhazer d'autra qu'anc nasques,
		prenda·us d'aquest caitiu merces,
	60	que dol si del cap tro als pes;
		e nom menetz tan malamen
		per lonc temps Guilhem Azemar,
		que pieiers es d'adomesjar
		d'esparvi er mudat o rramenc,
IX	65	Qu'ez ieu no fis anc falhimen
		don mi dejatz ochaizonar,
		si·m volia lai pres estar
		on vos vi, tro en mon velhenc.
X		Peironet, ab nullet apren
	70	lo vers a dir azaut e clar,
		que me fai Albis sospirar,
		quar midons en mos bratz non tenc.