Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 214,001 Auteur: Guillem de Durfort Genre: Sirventes Numero: LVII

Quar say petit, mi met en razon larga

I	1	Quar say petit, mi met en razon larga,
		quar leu troba qui pesca en estanc,
		per qu'ieu quere lay ont trobaray larc
		vertadier laus; e dic que cum colomba
	5	viu et esta en pretz, de que no rom,
		lay on se tanh ni·s requier per dever,
		Gui Cap-de-porc, qu'es arditz e cozens
		contra mals ayps, q'us viron luy no·n resta.
II		Tant ama pretz e·l col e tant se·n carga
	10	que plazer deu als pros quar elh fo anc;
		e qui aras se met en tal embarc
		de sostener valor, qu'a pauc non tomba,
		deu ne aver doble grat e bon nom;
		si s'a, qu'el pot e sap e vol valer;
	15	e negus hom no pot esser valens,
		si pretz de so qu'a dat a luy, non presta.
III		Ja·l fuecx d'amor non destrenga ni arga
		mas per razon son cors privat e franc;
		e si d'amar lo ten dompna pel marc,
	20	al gran request sia fortz cum retomba;
		quar bos arbres vay ades a sselh tom;
		e non es toms, ans per aquelh cazer
		deven engres amoros e plazens,
		quant en bon luec conquier bona conquesta.
IV	25	No·l cal vestir presset vermelh ni sarga,
		ni per solatz drap vert ni pers ni blanc,
		que de totz sap, e sobreluy son parc,
		pueg e costal, plan, ribeira e cumba.
		a, senher dieus, per que tal tuit non fom?
	30	qu'adoncx pogron trobar tuit lur plazer,
		paubres e ricx, sol que fos avinens;
		mas qui non a, es ara fols de testa.
V		Quon aurs en fuec o cum aciers en farga
		s'afin' ades, que manht bon paron ranc
	35	a segre luy en pretz, don vol gran carc;
		e no·l quier ges ni ab malh ni ab bomba,
		qu'ab agut sen tria l'argent del plom;
		et als bos ops sap sos ricx sens aver
		Gui, que sos noms es significamens
	40	„capdels e guitz"; veus paraula honesta!
VI		De nulha ren no ss'esmet ni s'embarga
		ses ben yssir; pero d'aitan me planc
		quar elh non a per quascun denier marc,
		qu'elh daurera so que manhta gens plomba,
	45	qu'ab lo poder que·s a, franh e corrom
		moutz mals, si que·s fai grazir e temer;
		e si amors vol totz bos complimens
		en pros, dompna belha d'aquelh revesta.
VII		Sirventes, vay a·n Peire-gros correns,
	50	que·t coferme e·th chant' e·n fassa festa.