Audiau, Jean. Les poésies des quatre troubadours d'Ussel, publiées d'après les manuscrits. Paris: Librarie Delagrave, 1922.

Code: 194,012 Auteur: Gui d'Ussel Genre: Canso Numero: VI

Ja non cudiei trobar

I	1	Ja non cudiei trobar
		Qi·m pogues restaurar
		Los dans c’avia pres ;
		Anz volia jurar
	5	Que·no m’entrameses
		D’amor, ni chanson non fezes ;
		Mas vos, dompna, cui ai chausida,
		Etz tant de gran valor complida,
		Que·l mal c’ai pres et atretan
	10	Podetz restaurar : per que chan.
II		E non avetz mais par
		Qe·m pogues joi donar,
		Ni don ieu lo preses ;
		Mas vos mi faitz chantar,
	15	Car sol m’avez promes
		Capteing, don serai, doussa res,
		Rics et honratz mais a ma vida,
		E vos, per mainta gen grazida ;
		Que bos capteins fai honor gran
	20	A celz qe·l prendon e qe·l fan.
III		Dompn’ en luoc de prejar
		Am fort e sai celar
		E grazir mals e bes,
		E solia·m clamar
	25	De mal, si m’avengues ;
		Mas non serai mais descortes
		Per malvaza gen eissernida,
		Ni no·s taing, que tal vos ai chausida
		Que pauc ni pro no·i a d’engan,
	30	Anz semblatz del cor lo semblan.
IV		E ja no·m cal doptar
		Per huoill que m’en esgar
		Ni per ren c’anc vengues,
		E sol hom ben gardar
	35	Sa plaia ; tals vetz es —
		Aisso·m fai lo dolz mals cortes —
		D’amor, q’es d’aital escarida,
		Que can nafra d’una partida,
		Sana puois, et a·m nafrat tan,
	40	Que garit m’a del mal d’antan.
V		D’aitan m’en puosc lauzar
		C’ab rir’ et ab jogar,
		Ses plus — c’anc no n’aic jes —
		M’avetz faich oblidar
	45	Lo desir e·l mal pes
		De lieis que no m’amava jes ;
		Car al sieu tort m’era faillida.
		Mas plaia, pos es tost garida,
		Torna ben maintas vetz a dan,
	50	E sobre tot plaia d’aman.
VI		Pros Comtessa, totz lo mons crida
		Que vos non fesetz anc faillida,
		Anz semblatz, — per q’ieu vos am tan, —
		Per un pauc cella don ieu chan.