Audiau, Jean. Les poésies des quatre troubadours d'Ussel, publiées d'après les manuscrits. Paris: Librarie Delagrave, 1922.

Code: 194,011 Auteur: Gui d'Ussel Genre: Canso Numero: VIII

Ja non cugei qu·em desplagues amors

I	1	Ja non cugei que·m desplagues amors,
		Ni·m tornes tan ad enoi ni a fais,
		Que mantas ves ab mi mezeis m’irais,
		Car anc un jorn soffertei sas dolors ;
	5	Mas eu, cum fols, cujava·m fos honors,
		Car amava de cor e ses bauzia.
		Et ara vei qu’en amar no·m valria
		Res menz d’amor, per qu’eu d’amar mi lays.
II		De totz mestiers es desemblad’amors ;
	10	Que menz en a de pro cel que·n sab mais,
		C’ab pauc de ben fa los fols rics e gais,
		E·l profietz es totz als galiadors ;
		Per que·m sembla c’amors sia follors.
		Donc be mi sui entendutz en follia,
	15	Qu’anc ses amor non saubi viur’ un dia,
		Ni anc, ses ben, tant de mal hom no·n trais.
III		Et ara es a tan tornad’ amors,
		Qu’anz que sapchan cals es pros ni savais,
		Volon amar las domnas ad essais,
	20	Per que camjon plus soven amadors.
		Et esta pietz us usajes que·n sors :
		Que ses amor pot hom aver amia.
		No·n dirai plus, per que ? Car mielz castia
		Quant o di gen amics que quan s’irais.
IV	25	Pero, si fos aitals com sol amors,
		Non dic eu ges que la valgues nuls jais,
		Qu’ilh loingnava de consirs e d’esmais,
		Mais quan del sieu, qu’era una dousors,
		Puois era pretz, sens, largues’ e honors,
	30	Enseingnamens, sabers e cortesia,
		Qui baiset tot, quan falset drudaria,
		E, si non tot, al menz arreire·s trais.
V		Et enpero, sitot m’a mort amors,
		Dei me gardar qu’en trop dir no m’eslais,
	35	Que ben leu s’es calsque amics verais
		Cui parria mos chastiars follors,
		Et a fin drut deu hom faire secors,
		Non ges blasmar, tan cum sec dreita via —
		C’om pert son dig e son amic perdria,
	40	— Tro que l’amors per si mezeissa·s bais.
VI		E s’amors val, ylh val per Na Maria,
		On es beutatz, e cortezi’e jais.