Audiau, Jean. Les poésies des quatre troubadours d'Ussel, publiées d'après les manuscrits. Paris: Librarie Delagrave, 1922.

Code: 194,013 Auteur: Gui d'Ussel Genre: Pastorela Numero: IX

L'autre jorn, cost' una via

I		L'autre jorn, cost' una via,
		Auzi cantar un pastor
		Una canson que dizia:
		« Mort m'an semblan traïdor ! »
	5	E, quant el vi que venia,
		Salh en pes per far m'onor,
		E ditz: « Deus sal mo senhor !
		Qu'er ai trobat, ses bauzia,
		Lejal amic celador
	10	A  cui m'aus clamar d'Amor. »
II		E quant eu vi qu'el volia
		Far de s'amia clamor,
		Eu li dis, ans que plus dia,
		Que sofr' en patz sa dolor,
	15	Qu'eu l'am e ges no volria
		Fezes de son mal pejor
		Per dig de lauzenjador :
		Qui ben ama ben castia,
		E qui conorta folor
	20	Vol qu'om la fassa major.
III		E·l pastre que·l mal sentia
		Tornet son cantar en plor,
		E ditz: « Mout ai gran feunia
		Quar vos aug castiador,
	25	Vos que dig avetz manh dia
		Mal de domnas e d'amor,
		Per qu'eu sui en gran error :
		Ar sai que ver ditz Maria,
		Quant ilh dis que cantador
	30	Son leugier e camjador. »
IV		— « Er aujatz tan gran feunia, »
		Fi m'eu, « d'aquest parlador,
		Que, quant eu·l mostrei la via
		D'esser franc e sofridor,
	35	M'apelet de leujaria ! »
		Mas eu sai sufrir aor
		Tan que, quan prec dezonor,
		Dic que servit o avia,
		Et appelli·m peccador,
	40	On totz lo peccatz es lor.
V		Ab tan vi venir s'amia ;
		Lo pastre de colhir flor,
		E viratz li tota via
		Camjar paraul' e color :
	45	« Bella, si anc jorn fos mia,
		Ses par d'autre prejador,
		Er no·us quier autra ricor —
		Mas del tort qu'eu vos avia
		Patz vencuda, ed amor,
	50	Tro que la·m fassatz major. »
VI		Ela respon al pastor
		Qu'el' es sa lejals amia,
		E feira·lh semblan d'amor,
		Si no li fos per paor.
VII	55	Et eu qu'era sols ab lor,
		Quan vi qu'enoi lor fazia,
		Laissei leis a l'amador :
		Parti·m d'els, e tinc alhor.