Audiau, Jean. Les poésies des quatre troubadours d'Ussel, publiées d'après les manuscrits. Paris: Librarie Delagrave, 1922.

Code: 194,014 Auteur: Gui d'Ussel Genre: Pastorela Numero: XI

L'autre jorn, per aventura

I		L'autre jorn, per aventura,
		M'anava sols cavalguan,
		Un sonet notan ;
		Trobey toza ben estan,
	5	Simpl'e de bella faitura,
		Sos anhels guardan.
		E quant ylh m'auzi chantan,
		Trays s'enan,
		E pres me pel fre e jura
	10	Qu'anc tan mal no fezi chan,
		E cridet Robi, no·s n'an.
II		« Toza, belha creatura, »
		Fi m'ieu, « cal forfag tan gran
		Vos ai fag si·m chan? »
	15	Ylh respon ab mal talan :
		« Quar lieys qu'era fin'e pura
		Apelletz d'enjan. »
		E Robis venc ab aitan,
		Menassan;
	20	Mas, quan me vi, m'asegura,
		E·m ditz que no·y penrai dan ;
		Qu'assatz n'ay ieu pres ogan.
III		Mas, quan vi qu'elh non a cura
		Que·m fezes ren mal estan,
	25	Ylh s'en va ploran,
		E Robis dic sospiran :
		« Pauc val merces ni dreytura,
		Lai on poder an,
		Per qu'ieu tenc per fol aman
	30	Qui las blan,
		Quar aitals es lur natura,
		Que dels falhimens que fan
		Volon nos sufram l'afan. »
IV		« Robi, laissatz la rancura,
	35	E cercatz, que·us o coman,
		Tal que no·us enjan ;
		Et eu amarai Duran,
		Que·m vol donar tal centura
		Que val un bezan,
	40	E vos no·m donetz un gan,
		D'aquest'an,
		Ni no·us peza·l desmesura,
		D'est fol mal dizen truan,
		Per que m'anatz encolpan. »
V	45	Mas Robis, cum folatura,
		Que que s'agues dit denan,
		Vai s'umilïan ;
		Mas ylh no l'au per semblan,
		Anz fuy on plus la conjura,
	50	E·l fols sec prejan.
		Et ieu, que·ls vau remiran
		Que faran,
		Met m'apres en l'ambladura ;
		Mas pero no·m cochey tan
	55	Que no·ls encontres baizan.
VI		E dissero·m en gaban
		Que m'en an
		Quere merce ni dreitura
		A lei don menti chantan,
	60	E que m'en lais ab aitan,
VII		Et ieu, que·ls vi embrassan
		E baizan,
		Prec Dieu que·m don aventura
		Qu'ieu trop dona ses enjan,
	65	Ab que fassa so qu'els fan.