Audiau, Jean. Les poésies des quatre troubadours d'Ussel, publiées d'après les manuscrits. Paris: Librarie Delagrave, 1922.

Code: 194,018a=413,001 Auteur: Gui d'Ussel , Rainaut (d'Albusso) Genre: Tenso (Partimen) Numero: XII

Segner Rainaut, vos qi·us faitz amoros

I	1	Segner Rainaut, vos qi·us faitz amoros,
		Respondetz mi segon vostr’ escien :
		De dos amantz qi amon leialmen,
		Qals deu esser per razon plus joios :
	5	Cel q’es jagutz una noig ab s’amia
		E n’a agut tot aqo q’el volia
		E torna s’en, o l’autres qui lai vai,
		Q’en cuid’ aver zo q’ab jazer s’eschai
II		En Gui d’Ucel, ges non fora razos
	10	Qu’eu respondes en aital partimen ;
		Car ni·l venir ni l’anar non enten ;
		Pero sui plus de l’anar cobeitos,
		Qe ren no sai de drut qi lai iria
		Com agues gaug, si adonc non l’avia,
	15	Ni de l’autre com pogues aver jai,
		Qant se partis d’aqo qe plus li plai !
III		Segner Rainaut, aitals partirs es bos
		De q’om a pretz, honor e jauzimen,
		E per q’om sap q’amatz es leialmen.
	20	Et en l’anar fail hom maintas saizos ;
		Qe maintas ves l’en partra gelosia
		O lauzengier o malastrucs en via ;
		Per q’ieu lo ben q’ieu n’ai agut pretz mai,
		Non fas aqel qe no sai si·l n’aurai.
IV	25	Per Dieu ! en Gui, be·us degran far joios
		Cel qi lai vai li bon entendimen ;
		Mas tal paor ha no·i trop espaven.
		Per qe sos jois non es tant cabalos ;
		Qe cel qi a joi de sa drudaria,
	30	S’el en vol mais, donc n’a el, senz faillia,
		Major enoi ; e qar faitz vos plus gai
		Cel qi s’en part, q’aicel qi lai s’atrai ?