Audiau, Jean. Les poésies des quatre troubadours d'Ussel, publiées d'après les manuscrits. Paris: Librarie Delagrave, 1922.

Code: 194,017=136,004 Auteur: Gui d'Ussel , Elias d'Uisel Genre: Tenso (Partimen) Numero: XIII

N'Elias, a son amador

I	1	N’Elias, a son amador
		A dig una domna qu’eu sai :
		« Bels amics, un prejador ai,
		Bon e bel e de gran valor,
	5	Et am lo tan que ses cor d’autr’ amor
		Lo voill colgar sol una nuoitz ab me,
		E voillatz ho, que·us ho quier per merce. »
		Digatz mi doncs, pois el si garda’n tan
		Qu’il lo preia, s’es dreitz que·ill o coman.
II	10	Cosin, sitot l’en fa paor
		La domna, ja eu non creirai
		Qu’o diga mas per plan essai
		S’ama tant que fezes follor.
		E si l’amics l’autreia ses clamor
	15	So qu’il li quier francamen et ab be,
		El n’aura grat et il no·n fara re,
		E s’il o vol aissi con fai semblan,
		S’el l’o defen, doblar n’a son talan.
III		N’Elias, a lausenjador
	20	Datz conseill tal cum el s’eschai,
		Que ten per be lo mal qu’el fai
		A sa domna et a son seingnor ;
		Mas ieu li gart leiautat et honor
		E dic per dreit qu’al drut non aperte
	25	Que l’o coman, anz faill, si no s’en cre ;
		Que totz hom fai vas son amic engan,
		Si·l autreia so qe·il es malestan.
IV		Cosin, ben fora dreitz alor
		Aiso que vos rasonatz sai ;
	30	Mas greu tenran l’amic verai
		Lo vostre conseill per meillor.
		Voletz auzir qe n’es dreitz en amor ?
		Aquel, ditz hom, que ama a bona fe,
		C’aitant viatz fai so que·is descove
	35	Cum zo que·is taing, sol sa domna l’en man ;
		Car autra lei non teno fin aman.
V		S·il drutz conois sa deshonor,
		N’Elias, et encontra·ill vai,
		La domna l’en prezara mai,
	40	E s’el s’en fai comandador,
		Al meins pot dir : « Ieu ai domnejador,
		Que m’ama tant et en tant pauc mi te,
		Que soffrir vol d’autre que jassa ab me ! »
		Doncs pren el dan et anta comandan,
	45	E defenden non pot mais penre dan.