Audiau, Jean. Les poésies des quatre troubadours d'Ussel, publiées d'après les manuscrits. Paris: Librarie Delagrave, 1922.

Code: 218,001=128,001 Auteur: Eble d'Uisel , Eble de Saignas Genre: Tenso (Partimen) Numero: XXVI

N'Eble, er chauzetz la melhor

I	1	N’Eble, er chauzetz la melhor
		Ades segon vostr’ escien :
		Lo quals a mais de pensamen
		E de cossirier e d’error,
	5	Selh que gran re deu, e payar
		No pot, ni·l vol hom esperar,
		O selh qu’a son cor en amor
		Et en domna, mas re no·l fai que·il playa ?
		Chausetz d’amdos, qu’ieu sai quals plus s’esmaya.
II	10	Guillem Guaysmar, anc per amor
		No trays hom piegz, de mon joven
		Cum fatz et ai fait, et enten
		Ni mais deya de ma ricor.
		Per qu’ieu sai, cum per assajar,
	15	Que no se fai a comparar
		Neguns mals a dolor d’amor ;
		Mas non es hom en tot lo mon pietz traya,
		Com selh cuy ditz quascus : « Paya me, paya ! »
III		N’Eble, tuit li dompneyador,
	20	Li pro e·l larc e li valen,
		Seran ab mi del jutjamen ;
		E ab vos seran l’uchador,
		E l’autra gens que no sap far
		Mas can tener et amassar.
	25	Mout vos da deutes gran paor,
		Per que se tanh qu’en son velhenc dechaya
		Ricx hom tosetz qui per deute s’esmaya.
IV		Guillem Guaysmar, quan li deutor
		Mi van apres tot jorn seguen,
	30	L’us me tira, l’autre me pren,
		E m’apellon baratador,
		Yeu volgr’ esser mortz sens parlar ;
		Qu’ieu no·m aus en plassa mostrar
		Ni vestir bos draps de color,
	35	Quar hom no·m ve que sa lengua no·m traya ;
		E s’ieu d’amor trac mal, be·s tanh que·m playa.
V		N’Eble, sapchatz que la dolor
		D’amor tenh major per un cen
		Que deute ni nulh sagramen ;
	40	Qu’ab belh dir pot hom son deutor
		Gent aplanar et apayar,
		Mas amors qui·m fai sospirar,
		Morir e languir ab dolor,
		N’i ai poder per ren que m’en estraya —,
	45	Tan tem morir, sol la dolors m’esglaya.
VI		N’Eble, ben sabon li pluzor
		Qu’om endeutatz no mor, sol manjar aya,
		Mas d’amor mor plus leu que d’autra playa.