Levy, Emil. Guilhem Figueira, ein provenzalischer Troubadour. Berlin: Buchdruckerei von S. Liebrecht, 1880.

Code: 217,001b Auteur: Guilhem Figueira Genre: Cobla (et réponse) Numero: 9

Bertram d'Aurel, se moria

		a.
		Figueira.
I	1	Bertram d’Aurel, se moria
		N’Aimerics anz de martror,
		Digatz, a cui laissaria
		Son aver e sa ricor,
	5	C’a conques en Lombardia
		Suffertan freit e langor,
		Com disoil albergador.
		Pero ben fez la metgia
		E dis del rei gran lauzor,
	10	Sol que s’o tenha ad honor.
		b.
		N’Aimerics de Pegulha.
II		Bertram d’Aurel, s’aucizia
		N’Auzers Figeral deptor,
		Digatz, a cui laissaria
		Lo seu fals cor traidor
	15	Plen d’enjan e de bauzia
		E d’enoiz e de folor,
		D’anta e de deshonor,
		Ni putans qui menaria,
		Ni arlot ni bevedor
	20	Que farian de senhor.
		c.
		Bertrams d’Aurel li respondet.
III		N’Aimeric, laissar poiria
		A’N Çoanet lo menor
		L’enjan e la tricharia,
		Car el viu d’aital labor,
	25	Els enoiz e la folia
		A N’Auzer lo fenhedor,
		E a ‘N Budel desonor,
		Et a ‘N Lambert la putia,
		El beure a ‘N Conplit Flor,
	30	Els arloz a N’Amador.
		d.
		Lambertz.
IV		Senher, cel qui la putia
		M’en laissa, s’en fai honor,
		Qu’eu m’o tenh a manentia,
		Qui m’en fai prez ni largor,
	35	C’anc a nulh jorn de ma via
		No volh far autre labor;
		Que fotres m’ac tal sabor
		Qu’eu’n laissei la clerezia,
		E tenh mon vet per prior
	40	E lo con per refreitor.