Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,025 Auteur: Bertran de Born Genre: Miei-sirventes Numero: XXXII

Miei-sirventes vueilh far dels reis amdos

I	1	Miei-sirventes vueilh far dels reis amdos,
		Q’en brieu veirem q’aura mais cavailhiers
		Del valen rei de Castella, N’Anfos,
		C’aug dir qe ven e volra sodadiers :
	5	Richarz metra a mueis e a sestiers
		Aur e argen, e ten s’a benanansa
		Metr’e donar, e non vol s’afiansa,
		Anz vol gerra mais qe qailla esparviers.
II		S’amdui li rei son prou ni corajos,
	10	En brieu veirem camps joncatz de qartiers
		D’elms e d’escutz e de branz e d’arços
		E de fendutz per bustz tro als braiers ;
		Es arage veirem anar destriers
		E per costatz e per piechz manta lansa
	15	E gaug e plor e dol e alegrança.
		Le perdr’er granz e·l gasainhz er sobriers.
III		Trompas, tabors, seinheras e penos
		E entreseinhs e cavals blancs e niers
		Veirem en brieu, qe·l segles sera bos,
	20	Qes hom tolra l’aver als usuriers,
		E per camis non anara saumiers
		Jorn afiçatz ni borjes ses duptansa
		Ni mercadiers qi venga deves França ;
		Anz sera rics qi tolra volontiers.
E	25	Mas se·l reis ven, ieu ai en Dieu fiansa
		Q’ieu serai vius o serai per qartiers.
E'		E si sui vius, er mi grans benanansa,
		E se ieu mueir, er mi grans deliuriers.