Serra-Baldó, Alfons. Els trobadors. Barcelona: Barcino, 1934 (2a ed. 1998).

Code: 461,012 Auteur: Anonyme Genre: Balada Numero: I

A l'entrada del tens clar

		[CANÇÓ DE DANSA]
I	1	A l’entrada del tens clar — eya!,
		per joia recomençar — eya!,
		e per jelos irritar— eya!,
		vol la regina mostrar
	5	qu’el’es si amoroza.
		A la vi’, a la via, jelos;
		laissaz nos, laissaz nos
		ballar entre nos, entre nos.
II		El’a fait per tot mandar — eya!,
	10	non sia jusqu’a la mar — eya!,
		piucela ni bachelar — eya!,
		que tuit non venguan dançar
		en la dansa joioza.
		A la vi’, a la via, jelos;
	15	laissaz nos, laissaz nos
		ballar entre nos, entre nos.
III		Lo reis i ven d’autra part — eya!,
		per la dansa destorbar — eya!,
		que el es en cremetar — eya!,
	20	que om no li voill’emblar
		la regin’avrilloza.
		A la vi’, a la via, jelos;
		laissaz nos, laissaz nos
		ballar entre nos, entre nos.
IV	25	Mais per nient lo vol far —eya!,
		qu’ela n’a sonh de viellart —eya!,
		mais d’un leugier bachelar —eya!,
		qui ben sapcha solaçar
		la domna savoroza.
	30	A la vi’, a la via, jelos;
		laissaz nos, laissaz nos
		ballar entre nos, entre nos.
V		Qui donc les vezes dançar —eya!,
		e son gent cors deportar —eya!,
	35	ben pogra dir de vertat —eya!,
		qu’el mont non aia sa par
		la regina joioza.
		A la vi’, a la via, jelos;
		laissaz nos, laissaz nos
	40	ballar entre nos, entre nos.
		(Text de Bartsch-Koschwitz)