Serra-Baldó, Alfons. Els trobadors. Barcelona: Barcino, 1934 (2a ed. 1998).

Code: 080,023 Auteur: Bertran de Born Genre: Sirventes Numero: XIII

Lo coms m'a mandat e mogut

		[SIRVENTÈS]
I	1	Lo coms m’a mandat e mogut
		per N’Aramon Luc d’Esparro
		qu’ieu fassa per lui tal chanzo
		on sian trenchat mil escut,
	5	elm et ausberc et alcoto,
		e perponh falsat e romput.
II		Et er ops que sia atendut,
		puois comtar mi fai sa razo,
		e que ges no dija de no,
	10	despuois que m’o a convengut;
		que blastimaran m’en gasco,
		quar de lor mi tenh per tengut.
III		A Tolosa, part Montagut,
		fermara·l coms son gonfano
	15	al Prat Comtal josta·l Peiro;
		e quan aura son trap tendut,
		e nos lotjarem de viro
		tan que tres nochs i jairem nut.
IV		E seran i ab nos vengut
	20	las poestatz e li baro
		e li plus onrat companho
		del mon e li plus mentaugut;
		qui per aver, qui per somo,
		qui per pretz, s’i seran mogut.
V	25	E desse que serem vengut,
		mesclar s’a·l torneis pel chambo,
		e·lh catala e·lh d’Arago
		tombaran soven e menut,
		que ja no·ls sostenran arzo:
	30	tan grans colps los ferrem nos drut.
VI		E no pot esser remasut,
		contra cel no volen tronzo,
		e que cendat e cisclato,
		e samit no·i sian romput,
	35	cordas, tendas, bechas, paisso
		e trap e pavilho tendut.
VII		Lo reis qu’a Tarasco perdut
		e·l senher de Mon-Albeo,
		Rotgiers, e·l filhs Bernart Oto
	40	e lo coms Peire lor n’aiut
		e·l coms de Fois ab Bernardo
		e·n Sanso, frair del rei vencut.
VIII		De lai pensen de guarnizo,
		que de sai lor er atendut.
IX	45	Totz temps vuolh que li aut baro
		sian entre lor irascut.
		(Text d’Appel)