Serra-Baldó, Alfons. Els trobadors. Barcelona: Barcino, 1934 (2a ed. 1998).

Code: 210,009 Auteur: Guillem de Berguedan Genre: Planh Numero: XX

Consiros cant e planc e plor

		[PLANY]
I	1	Consiros cant e planc e plor,
		pel dol que·m a sasit e pres
		al cor, per la mort mon marques
		En Pons, lo pros de Mataplana,
	5	qui era francs, larcs e cortes,
		e an totz bos captinimens,
		e tengutz per un dels melhors
		qui fos de San Marti de Tors
		tro ... e la terra plana.
II	10	Loncs consiriers ab greu dolor
		a laissat e nostre paes
		ses conort, que non i a ges
		En Pons lo pros de Mataplana;
		paians l’an mort, mas Dieu l’a pres
	15	a sa part, que·l sera garens
		dels grans forfatz e dels minors,
		que·ls angels li foron autors
		car mantenc la lei cristiana.
III		Marques, s’eu dis de vos follor,
	20	ni motz vilans ni mal apres,
		de tot ai mentit e mespres,
		c’anc, pos Dieu basti Mataplana,
		no·i ac vassal que tan valgues,
		ni que tant fos pros ni valens,
	25	ni tan onratz sobre·ls aussors,
		ja·s fosso ric vostr’ancesors;
		e non o dic ges per ufana.
IV		Marques, la vostra desamor
		e l’ira qu’e nos dos se mes
	30	volgra ben, se a Dieu plagues,
		ans qu’eissisetz de Mataplana,
		fos del tot pais, per bona fes,
		que·l cor n’ai trist e·n vauc dolens,
		car no fui al vostre socors,
	35	que ja no m’en tengra paors
		no·us valgues de la gent trufana.
V		E paradis, el luoc melhor,
		lai o·l bon rei de Fransa es,
		prop de Rolan, sai que l’arm’es
	40	de vos, marques de Mataplana;
		e mon joglar de Ripoles
		e mon Sabata eixamens
		estan ab las domnas gensors
		sobr’u pali cobert de flors,
	45	justa N’Ulivier de Lausana.