Serra-Baldó, Alfons. Els trobadors. Barcelona: Barcino, 1934 (2a ed. 1998).

Code: 242,003 Auteur: Giraut de Bornelh Genre: Canso Numero: XXIV

Ai las, com mor! —Quez as, amis?

		[CANÇÓ]
I	1	—Ai las, com mor! —Quez as, amis?
		—Eu sui trais!
		—Per cal razo?
		—Car anc jorn mis m’ententio
	5	en leis que·m fetz lo bel parven.
		—Et as per so to cor dolen?
		—Si ai.
		—As enaissi to cor en lai?
		—Oc eu, plus fort
	10	—Est donc aissi pres de la mort?
		—Oc eu, plus fort que no·us sai dir
		—Per que·t laissas aissi morir?
II		—Car sui trop vengonhos e fis.
		—No l’as re quis?
	15	—Eu, per Deu, no!
		—E per que menes tal tenso,
		tro aias saubut so talen?
		—Senher, fai me tal espaven!
		—Que·l fai?
	20	—S’amors que·m ten en greu esmai.
		—Be n’as gran tort;
		cudas te qu’ela t’o aport?
		—Eu no, mas no·m n’aus enardir.
		—Trop poiras tu to dan sofrir.
III	25	—Senher, e cals conselhs n’er pres?
		—Bos e cortes.
		—Er lo·m diatz!
		—Tu venras denan leis viatz
		et enquerras la de s’amor.
	30	—E si s’o ten a dezonor?
		—No·t chal!
		—E s’ela·m respon lach ni mal?
		—Sias sofrens,
		que totztems bos sofrire vens!
	35	—E si·s n’apercep lo gilos?
		—Adonc n’obraretz plus ginhos.
IV		—Nos? —Oc be. —Sol qu’ilh o volgues!
		—Er. —Que? —Si·m cres.
		—Crezutz siatz!
	40	—Be te sera tos jois doblatz,
		sol lo dichs no·t fassa paor.
		—Senher, tan senti la dolor
		mortal,
		per qu’es ops c’o partam egal!
	45	—Er donc tos sens
		que te valh’e tos ardimens!
		—Oc, e ma bona sospeissos.
		—Garda te que gen t’i razos!
V		—Razonar no·m sabrai ja be.
	50	—Dias, per que?
		—Per leis garar.
		—No·n sabras donc ab leis parlar?
		Est aissi del tot esperdutz?
		—Oc, can li sui denan vengutz...
	55	—T’espertz?
		—Oc eu, que no sui de re certz.
		—Aital fan tuch
		cilh que son per Amor perduch.
		—Oc, mas eu forsarai mo cor!
	60	—Ara non o torns en demor!
VI		—Be m’a aduch
		Amors a so, que sabon tuch,
		que mal viu qui deziran mor,
		per qu’eu no sai planher mo cor.
VII	65	—Vas to desduch
		vai, amics, ans c’o sapchon tuch,
		per que no perdas to resor;
		que levet pert om so demor!
		(Text de Kolsen)