Serra-Baldó, Alfons. Els trobadors. Barcelona: Barcino, 1934 (2a ed. 1998).

Code: 335,015 Auteur: Peire Cardenal Genre: Chanson religieuse Numero: XXXVI

Dels quatre caps que a la cros

		[CANÇÓ]
I	1	Dels quatre caps que a la cros
		ten l’us sus ves lo firmamen,
		l’autre ves abis qu’es dejos
		e l’autre ten ves Orien
	5	e l’autre ten ves Occiden,
		e per aital entrensenha
		que Crist o a tot en poder.
II		La crotz es lo dreg gofainos
		del rey cui tot quant es apen,
	10	qu’om deu seguir totas sezos,
		las soas voluntatz fazen;
		quar qui mais y fai, mais y pren;
		e totz hom qu’ab lui se tenha
		segurs es de bon luec aver.
III	15	Cristz mori en la crotz per nos
		e destruis nostra mort moren,
		et en crotz venquet l’orgulhos
		el linh on venia la gen;
		et en crotz obret salvamen,
	20	et en crotz renhet e renha,
		et en crotz nos volc rezemer.
IV		Aquest faitz fo meravilhos
		qu’el linh on mortz pres naissemen,
		nos nasquet vida e perdos,
	25	e repaus en luec de turmen;
		en crotz pot trobar veramen,
		totz homs, que querre l’i denha,
		lo frug de l’albre de saber.
V		Ad aquest frug sem totz somos
	30	qu’el culham amorozamen;
		qu’el frug es tan.belhs e ten bos
		que, qui·l culhira ben ni gen
		totz temps aura vida viven;
		per qu’om del culhir no·s fenha,
	35	mentre que·n a luec e lezer.
VI		Lo dous frug cuelh qui la crotz pren
		e sec Crist vas on tenha,
		que Cristz es lo frugz de saber.
		(Text de Raynouard)