Serra-Baldó, Alfons. Els trobadors. Barcelona: Barcino, 1934 (2a ed. 1998).

Code: 248,065 Auteur: Guiraut Riquier Genre: Retroencha Numero: XXXIX

Pus astres no m'es donat

		[CANÇÓ DE DANSA*]
I	1	Pus astres no m’es donat
		que de midons bes m’eschaya,
		ni nulhs mos plazers no·l platz,
		ni ai poder que·m n’estraya,
	5	ops m’es qu’ieu sia fondatz
		en via d’amor veraya:
		e puesc n’apenre assatz
		en Cataluenha la gaya,
		entre·ls catalans valens
	10	e les donas avinens.
II		Quar dompneys, pretz e valors,
		joys e gratz e cortezia,
		sens e sabers et honors,
		belhs parlars, bella paria,
	15	e larguesa et amors
		conoyssensa e cundia
		troban mantenh e secors
		en Cataluenha a tria,
		entre·ls catalans valens
	20	e les donas avinens.
III		Per qu’ieu ai tot mon acort
		que d’elhs lurs costums aprenda,
		per tal qu’a mon Belh Deport
		done razon, que m’entenda;
	25	que non ai autre conort,
		que de murir me defenda,
		et ai cor per penre port,
		qu’en Cataluenha atenda,
		entre·ls catalans valens
	30	e les donas avinens.
IV		E s’ieu entre·lhs non aprenc
		so per qu’Amors guazardona
		servir als sieus, don dan prenc,
		no·y a mas qu’om me rebona;
	35	quar tant d’afan ne sostenc,
		que m’a gitat de Narbona,
		e per gandir via tenc
		en Cataluenha la bona,
		entre·ls catalans valens
	40	e les donas avinens.
V		Tan suy d’apenre raisos
		so que d’amar ai falhensa,
		que nulhs pessars no m’es bos
		mas selh qu’als verays agensa;
	45	e quar no·l say ad estros,
		vau per bona entendensa
		querre e trobar cochos
		en Cataluenha valensa,
		entre·ls catalans valens
	50	e les donas avinens.
		(Text d’Anglade)