Serra-Baldó, Alfons. Els trobadors. Barcelona: Barcino, 1934 (2a ed. 1998).

Code: 248,017 Auteur: Guiraut Riquier Genre: Vers Numero: XL

Be·m degra de chantar tener

		[CANÇÓ*]
I	1	Be·m degra de chantar tener,
		quar a chan coven alegriers;
		e mi destrenh tant cossiriers
		que·m fa de totas partz doler,
	5	remembran mon greu temps passat,
		esgardan lo prezent forsat
		e cossiran l’avenidor,
		que per totz ai rezon que plor.
II		Per que no·m deu aver sabor
	10	mos chans, qu’es ses alegretat;
		mas Dieus m’a tal saber donat
		qu’en chantan retrac ma folhor,
		mo sen, mon gauch, mon desplazer,
		e mon dan et mon pro per ver,
	15	qu’a penas dic ren ben estiers;
		mas trop suy vengutz als derriers.
III		Qu’er non es grazitz lunhs mestiers
		menhs en cort que de belh saber
		de trobar; qu’auzir e vezer
	20	hi vol hom mais captenhs leugiers
		e criz mesclatz ab dezonor;
		quar tot quan sol donar lauzor,
		es al pus de tot oblidat,
		que·l mons es quays totz en barat.
IV	25	Per erguelh e per malvestat
		dels christias ditz, luenh d’amor
		e dels mans de nostre Senhor,
		em del sieu Sant Loc discipat
		ab massa d’autres encombriers;
	30	don par qu’elh non es aversiers
		per desadordenat voler
		e per outracujat poder.
V		Lo greu perilh devem temer
		de dobla mort, qu’es prezentiers,
	35	que·ns sentam sarrazis sobriers,
		e Dieus que·ns giet a non chaler;
		et entre nos, qu’em azirat,
		tost serem del tot aterrat;
		e no·s cossiran la part lor,
	40	segon que·m par, nostre rector.
VI		Silh que crezem en unitat,
		poder, savieza, bondat,
		done a sas obras lugor,
		don sian mundat peccador.
	45	Dona, Maires de caritat,
		acapta nos per pietat
		de ton filh, nostre redemptor,
		gracia, perdon et amor.
		(Text d’Anglade)