Betti, Maria Pia. Le Tenzoni del Trovatore Guiraut Riquier. "Studi Mediolatini e Volgare", 44 (1998), pp. 7-193.

Code: 154,002a=248,038 Auteur: Folquet de Lunel , Guiraut Riquier Genre: Tenso (Partimen) Numero: XV

Guiraut, pus em ab senhor cuy agensa

I		Guiraut, pus em ab senhor cuy agensa	[Folquet]
		joy e solatz, e·l play que fassam tensa,
		respondetz mi segon vostr'en[ten]densa
		d'un cavayer, c'amet lonja sazo
	5	dona que·l plac mais que res, ses falhensa,
		tan que·l colquet ab si tot a bando:
		de cal dec aver may bona sabensa,
		cant si colquet o cant levatz en fo?
II		Folquet, qui a razon e conoissensa	[Guiraut]
	10	sap que plazers es magers en prezensa,
		per que conois que·l colcars de plazensa
		dec bo saber al cavayer, e no
		ges lo levars, s'amors ni bevolensa
		lo y amenet; ans fetz gran falhizo,
	15	si del levar ac plazer, car parvensa
		fes qu'el jazers se tengues a prezo.
III		Mal avetz pres, Guiraut, al mieu vejaire,	[Folquet]
		d'est partimen, cossi pogues retraire
		que mais deia plazer so qu'es a faire,
	20	que cant hom a complit son dos dezir.
		May val fis joys, cant es pres a gran aire
		de so c'om vol may que res possezir,
		que no fai sel de c'om se pot estraire:
		per que·l levar dec may l'amans grazir.
IV	25	D'aquel plazer sos espers fa maltraire	[Guiraut]
		e·l penr'es gaug, c'om maior non sap gaire,
		mas pus es pres, nulhs homs no·l pot atraire
		ab bon saber mas cant del sovenir,
		Folquetz, e vos no semblatz fis amayre,
	30	cant del levar mandatz l'amans jauzir,
		que·l dec esser pus greu que mort de paire:
		mal razonatz, e pieitz saupes partir.
V		Guiraut, vers es que sofre malanansa	[Folquet]
		sel c'aten joy tro que·l pren ses duptansa,
	35	per c'al levar dec aver alegransa
		lo cavayers mays que cant l’ac colcat
		sidons ab si, et es mielh de semblansa
		c'ap lieys agues son plazer acabat
		que can si mes; et aves ses esmansa
	40	pres e cauzit, si c'om vo·n te per fat.
VI		Endreg d'amor razonatz gran erransa,	[Guiraut]
		Folquet, don par c'anc no·us tenc en balansa,
		car joys d'amors non a nulh'acabansa
		ni·s pot complir per ren mas per desgrat.
	45	Mas si·l vostre pec razonars s'avansa,
		dona non deu far mais aman paguat,
		car l'amans dec de colcar gran pezansa
		aver, si·l plac lo levar, per vertat.
VII		Per lo comte de Cumenge, qu'enansa	[Folquet]
	50	fina valor, vuelh que sia jutjat,
		Guiraut, qu'el saup que fon lial amansa,
		mas paor ay que·l sia oblidat.
VIII		Folquetz, no·m fay lo jutjamen doptansa,	[Guiraut]
		qu'ieu razoni ver e sera proat,
	55	que·l coms a de tot cant saup membransa,
		e non dira per ren mas la vertat.