Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 304,002 Auteur: Monge de Foissan Genre: Canso Numero: LXXXVII

Be volgra fos mos cors tan regardans

I	1	Be volgra fos mos cors tan regardans
		que ia en res qu'hom leu perdre pogues,
		tot son esper ni s'amor non pauzes,
		qu'aitals perda non es, mas mortals dans;
	5	qu'ieu amava ab tan fin' esperansa
		midons qu'en als nulh esper non avia,
		e quant er vey perdut so qu'atendia,
		murir no puesc, mas be·n suy dezirans.
II		Qu'ieu ay perdut mon esper e mos chans
	10	e tot lo ioy qu'ieu avia dels bes
		que·m fazia silh en cuy ia no·m pes
		cossegre, mais tant s'es voutz sos talans,
		no ssai per que, qu'ieu n'ai tal malanansa
		qu'anc pueys nulhs ioys non ac ab mi paria,
	15	qu'adoncx perdey s'amor, quan mielhs crezia
		esser amatz, per qu'es mos mals pus grans.
III		Quar hom que pren mal don non es duptans,
		piegz n'a que selh qu'esta duptos ades;
		per que fora bos sens que hom penses
	20	qu'apres lo bo giet hom leu avol lans,
		que totz le muns cor en aital balansa
		qu'ades va ius so que de sus tenia,
		qu'ieu era guays, quant a midons plazia,
		aras non ai mas anguoyssa et afans.
IV	25	Pero ades qu'eu suy desesperans,
		volgr'ieu esser del tot sieus, si·l plagues;
		sieus si suy yeu, playa li o li pes;
		mas quar no·l platz, d'aitant suy malanans,
		qu'ieu y pert me e ioy e benanansa;
	30	e si·l plagues, agra·n be qualque dia,
		mas aras par que destinat me sia
		tostemps viure doloyros e plorans.
V		Quan dels plazers, dona, suy remembrans
		que ia m'a faitz vostra bona merces,
	35	lo mals qu'ieu ai, mi dobla per un tres,
		per qu'ieu volgra que·l mals vengues enans
		e qu'er fines en ioy nostr' acundansa;
		quar mal ab be auci hom tota via;
		mas a mi par vulhatz vos, bell' amia,
	40	aucire mi, que·us suy sers e comans.
VI		Pus falhit ay, dona, en vostr' esperansa,
		totz le muns say huey mais que·m falliria,
		per qu'ieu lays chans e ioy e gualaubia
		e prendi plors e sospirs et afans.
VII	45	No·m say quo·us am ses esper, bell' amia,
		ni say cossi me·n puesqua esser layssans.