Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 323,019 Auteur: Peire d'Alvernha Genre: Vers Numero: XC

Lo fuelhs e·l flors e·l frugz madurs

I	1	Lo fuelhs e.l flors e.l frugz madurs,
		quan es sazos,
		m'es ioys e gaugz m'adutz,
		e·l retins per plas e per murs
	5	dels auzelhos
		e·l rossinhols qu'el ram relutz,
		qu'entendemens
		mi ven e voluntatz
		d'esser sabens
	10	de mais en mielhs assatz.
II		Quar ses gaug grans sabers ni purs
		ni gienh ginhos
		non er aut elegutz;
		qu'ie·m cre en cent augurs
	15	iauzens ioyos;
		e iauzens mantengutz
		contra tals gens
		cuy falh sciensa e patz,
		eu vi, encens
	20	sobrels enamoratz.
III		Qu'ab lo plus gent ioy vau segurs
		qu'anc entre nos
		sai fos aparegutz;
		e no mi tenra·n dan digz durs
	25	d'omes iros
		ni lauzengiers lengutz,
		que·l assenatz sens
		no·s camja ni·l beutatz
		don suy iauzens
	30	de bon'amor amatz.
IV		E sembla·m ben als ditz escurs
		et en razos
		de dir ses motz romputz;
		de que cove que mot mellurs
	35	tu, cuy det sos
		e motz far mentaugutz,
		que·l mai manens
		d'autruy part pert viatz
		bos covinens,
	40	pus no y ren dels dos gratz.
V		Mas de mi non au ja rancurs,
		que cobeytos
		suy sobr'autres drutz
		d'esquivar contra fals tafurs
	45	e d'amoros
		esser e ben volgutz,
		quar si trop tens
		mi fes fals'amistatz,
		ia·m sent tenens
	50	de finas afinatz.
VI		E quals qu'an contr'amor periurs,
		ieu serai bos
		ves l'amor que·m condutz,
		e francs e ferms en mos aturs;
	55	e·l sospeyssos
		er en los sieus aiutz;
		don sapiens
		suy e mai melhuratz
		d'autres sinc cens
	60	d'amor enamoratz;
VII		Que cum l'aurs resplan en l'azurs
		contra·l berros
		. . . . sobrels escutz,
		mi det do, tro lai ont es Surs,
	65	qu'ieu sobriers fos
		als grans et als menutz
		dels esciens
		de trobar ses fenhs fatz,
		don suy grazens
	70	ad aquelh don m'es datz.