Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 323,020 Auteur: Peire d'Alvernha Genre: Vers Numero: XCI

L'airs clars e·l chans dels auzelhs

I	1	L'airs clars e·l chans dels auzelhs,
		la flors fresca e la fuelha
		que s'espan per los brondelhs
		— e·l vertz herba bruelha —
	5	mi mostra d'esser ysnelhs
		q'un vers non-clus cuelha
		tal que·l sos sia novelhs,
		que·l chant qui ia·s vuella,
		per qu'ara chanten cavallier,
	10	que chans aporta alegrier,
		e pert de son segle lo mays
		qui seguon sazo non es guays.
II		Qu'ira ni grans cossiriers
		non obra boneza,
	15	qu'ans es dans, e destorbiers
		non obra proeza,
		que, cum totz mals encombriers
		mou de cobezeza,
		atressi sortz totz faitz niers
	20	d'embronquar, qui·l veza.
		doncx qui de gaug a dezirier,
		tengua a dreyt so semdier,
		e l'ira e l'avol parven lays
		als malvatz malfachors savays.
III	25	Mas dels dos ioys a ops: sens
		e reconoyssensa;
		e l'us es abaissamens
		e l'autre creyssensa.
		e s'om s'es lo mon seguens,
	30	vir se on mais l'agensa,
		qu'ayselh sos faitz es grazens
		qu'es ses repentensa;
		qu'aital es de gaug ufanier,
		qui·lh sec e defug l'autr' entier,
	35	cum del can cuy cazec del cays
		la carns, quan l'ombra el' aigua·l trays;
IV		Perque, qui del ioy munda
		s'apropch' e ss'aserma
		sí: „era·l terras“, non l'a,
	40	que, quan creys mais, merma;
		quar, s'amors fon bona ia,
		qui no·m pliu ni·m ferma
		que no m'o menta dema,
		don l'amars s'azerma
	45	fors cum volva descordier?
		ieu no sai; e serc e quier
		l'amor on non a ren biays,
		on ma bon' esperansa·m pays;
V		Que·l sieus ioys gensetz esiau
	50	selhuy qui·l s'autreya
		senes fenh' e ssemblant brau
		e ses vair enveya,
		qu'ades a quasqun iornau
		sai viu e verdeya
	55	sa valors ab ver lonc lau,
		cuy totz pretz sopleya;
		que, cum resplan roz' en rozier
		gensetz d'autra flor de vergier,
		sobra sobre totz ioys sos iays
	60	del maior gaug qu'anc nasc ni nays.
VI		Lo vers chant qui.l sabra ses brays,
		on mot mi platz, de qui mas bays.