Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 330,016 Auteur: Peire Bremon Ricas Novas Genre: Canso Numero: XCV

Si·m ten amors     ab dous plazer iauzen

I	1	Si·m ten amors   ab dous plazer iauzen
		qu'ins en mon cor port de fin ioy la clau,
		que·l caut ni·l freg ni·l brau temps ni·l suau
		no·m nozon re, tan me vay ben e gen
	5	que tot m'es plazen,
		e mos enemicx
		non tem, tan suy ricx
		de ioy e d'amor.
		en que m'alegor?
	10	qu'aitals ricors me soste,
		et autra no·m tenc en re.
II		Aitals ricors   m'abelhis, quan soven
		pens del tezaur de cuy ieu tenc la clau,
		ab tal plazer, si tot m'estau suau,
	15	que res mas ioy ins e mon cor non sen;
		sí·m vai dossamen;
		e·l gilos enicx
		no·m pot far destricx
		a iauzir l'onor.
	20	en que m'alegor?
		quar ai triat, per ma fe,
		mielhs de melhor e de be.
III		Ben dic lauzors   veras adrechamen,
		plazen dona, quar vos tenetz la clau
	25	d'onrat ioy fi et avetz pretz suau
		sobre valen gentil captenemen,
		si que·l conoyssen
		de cui suy amicx,
		dizon qu'es abricx
	30	de vera valor.
		en que m'alegor?
		quar ditz qui·us au ni vos ve,
		que mays ni meyns no y cove.
IV		Tot lo dreg cors   sai d'amor finamen
	35	aissi cum selh que d'amor ten la clau;
		per so·us chauzi, pros dompna, tan suau
		per la melhor e per la pus plazen,
		que no y a conten;
		ni anc fals prezicx
	40	d'omes moys ni tricx
		iorn no·m fes paor.
		per que m'aleguor?
		quar vey que pro non lur te
		fals mentirs ni·m notz en re.
V	45	Vostra valors   estai seguramen,
		que nulhs laire no y pot far contraclau;
		et a mi vai sobre-ben e suau,
		quar la guardatz ab mezura e ab sen
		tan be que no y pren
	50	crims de croys mendicx;
		ni malvatz aficx
		de lauzenjador
		no·m tolh ma legor
		ni·l honrat ioy que·m soste,
	55	dona, la vostra merce.
VI		Dompn'ai e senhor
		en que m'alegor,
		Sordelh, per que·m vai tan be
		qu'enveya no·m tenc en re.