Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 330,019 Auteur: Peire Bremon Ricas Novas Genre: Canso Numero: XCVII

Tut van canson demandan

I	1	Tut van canson demandan
		ses talen d'ausir,
		mas fan en senblan,
		q'anc pos faglir
	5	amor. . . . . . vai baisan,
		solhatç non ac sabor gran
		ni s'alegret hom cantan;
		e si·l pros lonbart presan
		o volgeson cosentir,
	10	del tut for' amors perduda
		e·l benfac perdut;
		mas pres per la lur vertut
		creis e s'esvertuda.
II		Lonbart sai eser d'aitan
	15	c'ieu non uoigll c'om gir
		de gioi ni de can;
		antç voill obesir
		ferms e fins de bon talan
		midon, ce·m met en songnan,
	20	e amor, ce·m vai gravan,
		c'abdus si lo senblan.
		on plus mi volon delir,
		c'apres ma pena creguda
		n'aurai gioi cregut,
	25	cant amors, ce m'a vençut,
		m'aura lei vencuda.
III		Amors mi sec menasan,
		c'ieu non puosc fugir;
		lieis, ce·m fug denan,
	30	non puosc ieu segir.
		ainsi·m van abdui penan,
		l'uns fugen, l'autre casan,
		c'amors, ce·m vai trabaglian,
		me ten, l'autra·m fue e·m gan,
	35	ce·m pogra del tut garir.
		l'uns me pren, l'autre·m refuda,
		c'ieu non refut,
		car esper n'aver salut,
		sol s'ela·m saluda.
IV	40	Mos cors e mei uogll mi fan
		penar e langir,
		e·l cor consiran
		e li uogll causir
		liei, ce·m vai de si lugnan.
	45	car vesen liei vogll mon dan,
		vau sai e lai esgardan
		autra qe·m leuges l'afan;
		mas tart es del repentir,
		car mos fins cors, ce no·s muda,
	50	me dis c'ieu no·m mut,
		e non vol c'autra m'agut,
		s'ela non m'aguda.
V		A drec se vai rancuran,
		qu'ab mos uogllz s'asir,
	55	c'a tart van miran
		la gensor ce·s mir,
		don lo cor plaign desiran,
		car ben son pasat dui an
		c'ieu non vi mas en pensan
	60	lo sieu gen cor benestan,
		don soven planc e sospir.
		tan val sa lausors sapuda
		de bon pres saubut
		q'a liei m'autrei per retengut,
	65	gia no·m fos tenguda.
VI		Pro comtesa mentaguda
		de pres mentagut,
		vos aves de pres cregut
		Proensa encrecguda.