Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 342,002 Auteur: Peire Espaignol Genre: Canso Numero: CII

Com selh que fon ricx per encantamen

I	1	Com selh que fon ricx per encantamen
		et em breu temps perdet sa benanansa,
		ai yeu estat ricx per bona esperansa,
		mas eras suy tornatz en pessamen.
	5	aissi m'es pres cum a sselh que al port
		se·n es vengutz, que cuj'aver estort
		tot son tezaur, pueys vens ab mal uzatge
		fa·l tan d'enueg que·l veda lo ribatge.
II		Aitals destricx me da.l pretz ab ioven
	10	de la bella per qu'ie·m don alegransa,
		que, quan la prec, m'es d'esquiva semblansa,
		et als autres a bon aculhimen.
		per so·m destrenh s'amors ab piegz de mort
		quar no·m acuelh, mas de merce·m conort
	15	qu'escantisca la flama del linhatge,
		que nays d'amor e cor sobre paratge.
III		E quar amors a en mi mandamen,
		s'aman m'auci, fara desmezuransa.
		mas yeu suy folhs, quar non ai preza esmansa
	20	de l'aiga que no bulh, de Pueg-olen,
		qu'aital truep lieys, per que fais d'amor port,
		que, quant ai fach chanso, vers ni descort
		ni res que·l degues esser d'agradatge,
		semblan me fa que·l sia trop salvatge.
IV	25	Uzatges es qu'els fols sion fallen
		tug be, e·l fi qu'atrobon acordansa;
		per vos o dic, dompn', on valors s'enansa,
		. . . . . . . . . . . . . . . . . . . .
		que ia, si·us platz, no·m aucizatz ses tort,
	30	qu'ie·us plieu, si tot amors mi destrenh fort,
		que non iesca del onrat senhoratge
		en que·m mezi, quan vos fi homenatge.
V		E no vedetz vostra valor valen
		a cauzimen ni a merce, que lansa
	35	humilitat ab esgart en amansa,
		qu'umils ab ric deu trobar chauzimen.
		e si mos precx pren ab vos tal acort,
		aura·m merces del mal d'amor estort,
		que·m destrenh tan per vos mon fin coratge
	40	que·n fauc quec iorn mil sospirs per uzatge.
VI		Bel Dos-Esgart, tan vos am d'agradatge
		c'autra non es per qu'ie·m des alegratge.