Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 349,008 Auteur: Peire Milo Genre: Canso Numero: CV

S'ieu ai d'amor sufert ni mal ni pena

I	1	S'ieu ai d'amor sufert ni mal ni pena,
		dol ni trebaill ni destreg ni rancura,
		dan ni maltrach, per caut ni per buerna,
		ni plors ni gems ni cossirs ni sospire,
	5	ara·l grazisc lo ben, car ill mi dona
		lo ioi, l'enans, lo deport, l'alegransa
		e lo solatz de tota benvollensa,
		qi·m platz aitan qe no·m par qe mals seia.
II		Auiatz lo pro e·l ben q'amors demena
	10	encontra cell envas cui ill s'atura,
		qe chascus hom cui malvestatz governa,
		s'amors s'atrai vas lui, al meu albire
		lo ren cortes, larg e pro, e s'adona
		ab los valens, e val mais s'acondansa
	15	be mil aitans, e de totz bes l'agensa.
		cell q'aisso fai, si par q'amar si deia!
III		Fals lauzengier, la mala carentena,
		oc, e·l mal an aiatz, qar tal falsura
		sai mantenetz per qe li gens s'enferna
	20	e·l gaugz del mon torn' en plor e en ire,
		qar vos blasmatz amor, qe tant es bona,
		sol per aisso qar no·us dona s'amansa;
		e non es dretz q'aia sa benvoilhensa
		qi nuech e iorn tan con pot, la gerreia.
IV	25	Chascus fai be qi sa lenga refrena
		e qi garda razo, dreg e mesura.
		q'aso non fa, degra esser en cisterna
		e degr' aver pena e dan e martire.
		e si ieu fos seinher de la corona,
	30	als malastrucs qi obran ab musansa
		e paraulas largan senes temensa,
		de las gautas la lenga lur traireia.
V		La merce dieu, d'amor sui en cadena,
		e serai o, mentre ma vida·m dura.
	35	no remanra, si tot hom se·n enferna,
		q'ieu non sia sos hom e sos servire.
		e dey o far, qar ill de tal persona
		vol q'ieu aia s'amor e s'acondansa,
		q'es li genser de tot lo mon ses tensa.
	40	gratias ll'en ren qar lo vol e l'autreia!