Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 376,002 Auteur: Pons Fabre d'Uzes Genre: Sirventes (Sestina) Numero: CXI

Quan pes qui suy, fuy so que·m franh

I	1	Quan pes qui suy, fuy so que.m franh,
		mas trop m'an dich fals fach flac frach,
		per qu'ieu volgra cor franc e ferm,
		fi e fizel, fermat e fort,
	5	quar manh mi dizon qu'aissi·m pert,
		quar m'abric say, on sol non fer.
II		En folh atur m'atur, e.m fer
		quar miels mon cor bru blau non franh.
		e s'ieu amor per amar pert,
	10	car compri·l cor menut e frach.
		may er amar mi son e fort
		li fals fag flac per que m'enferm.
III		En selh qui·m fes, me·n fi que.m ferm
		mon desfermat cor fals e fer,
	15	quar tant m'aprim que·l crim que·m franh,
		aprim e lim, per qu'elh s'espert,
		qu'ab dur atur l'auray tost frach,
		s'asag maltrag ni s'ai cor fort.
IV		S'ieu leu no·m leu del fays trop fort,
	20	tem so que·l cors e·l cor mi franh.
		e qui apert e fols si pert,
		non s'es mes en luec fort ni ferm,
		per qu'ieu m'afferm, quom qui fort fer,
		qu'ie'n luec so·m mes eferm e frag.
V	25	Er lays lo lays fel fol e frag
		per selh que silh canton plus fort.
		e cre que be ses dupte·m franh,
		quar trop atrop selh qui·s franh, fer
		bis bric bas blos fals e non ferm,
	30	e selh qui plus l'ama, s'espert.
VI		Ben sai que say, que sai si pert
		tam be que uns no ve que frag,
		per que·m deslonh de so qu'es fer,
		e·m met en so que sai plus ferm.
	35	e qui layssa feni per fort,
		pren ferm, per so qu'el ponh se franh.
VII		Quec prec que lays feni per ferm,
		ans que layssat l'aya plus fort.
		so que sse pert, ad autruy franh.