Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 396,001 Auteur: Raimon de Castelnou Genre: Canso Numero: CXIX

Er a ben dos ans passatz

I	1	Er a ben dos ans passatz
		que chantars no·m ac sabor.
		quar no·m iauzia d'amor,
		m'era de trobar laissatz,
	5	mas ara·m creys a bando
		de la don plus mi sap bo,
		ioys e solatz bos et brieus,
		que val mais que loncx e grieus.
II		E doncx mos chans envejatz
	10	si'auzitz ans del pascor,
		qu'er non dey atendre flor,
		tan gent n'ai estat preyatz
		per lieys, cuj fas de mi do;
		e no·n rete guizardo,
	15	ans mi creys de tant mos fieus
		qu'ieu no·n penria Peitieus. —
III		E si tot si fon vertatz,
		quan be·m albir sa valor,
		non aus dir tan de ricor
	20	de mi denhes penre patz; —
		ans ment, dizen que no fo,
		tan tem qu'ades m'ocayzo.
		e si per lieys ment,
		los sieus ia no mé·n encolpe dieus.
IV	25	Sieus suy ieu endomenjatz,
		qu'autra non am ni azor
		. . . . . . . . . . . . . . . .
		quar no·s tanh sia colratz.
		ades n'i vey plus que pro
	30	del linhatge Guaynelo,
		que de fors son Sanh Andrieus,
		e·l cor es dedins juzieus.
V		Anc d'aquestz no fuy privatz,
		pus ben viriey ma color
	35	e vis anc son cors gensor.
		bels blancs gras grail'e delgatz
		vos dic qu'es, ades sazo
		gentils de belha razo,
		e non es camjans ni lieus,
	40	per que suy sieus mielhs que mieus.
VI		Jauzens fora e paguatz,
		si no·m lunhes de s'amor,
		quar lai on mielhs chant, ieu plor,
		quan mi sove can viatz
	45	mi partrai de sa reyo;
		e si·l lays en tenezo
		mon cor, e veyra mos brieus
		breument, si no·m falh corrieus.
VII		De bon cor dey estre sieus,
	50	qu'enves lieys es bruna nieus.