Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 396,002 Auteur: Raimon de Castelnou Genre: Canso Numero: CXX

Aras, pus ai luec e sazo

I	1	Aras, pus ai luec e sazo,
		m'es belh qu'ieu chant d'una razo
		que la coynda, gay' e plazens
		m'a mandat qu'ieu per lieys comens
	5	. . . . . . . . . . . . . . .
		et ieu vuelh estr' obediens
		derenant als sieus mandamens,
		si cum lieys plaira plaire.
II		Jeu no sai nulh tan aut baro,
	10	sol qu'a lieys denhes saber bo
		si·lh era francx e ben volens,
		que no·n degues esser iauzens,
		tant es de gentil aire,
		qu'en lieys renha beutatz e sens,
	15	laus e pretz et ensenhamens,
		e ioys en son repaire.
III		E quant aitals domna.m somo
		de chantar, ai ben ocayzo
		don deu esser mos chans valens
	20	entrels adreitz e·ls conoyssens;
		si s'er al mieu veiayre,
		si doncx no mi notz espavens,
		que non a par mos garnimens,
		qui la ve ses dey traire.
IV	25	E doncas, as tu sospeisso
		que·t vuella d'amor tener pro,
		si tot t'acuelh ab huelhs rizens
		ni l'es vengutz abelhimens
		que sias sos chantaire? —
	30	o ieu, qu'amors et astres vens
		los pus fortz, et es me·n guirens
		lo seynher de Belcaire.
V		E per so crey, s'ieu m'abando
		d'aver fin cor leyal e bo,
	35	qu'en ben amar no sia lens,
		e l'obra e·l captenemens
		sia quo·l filhs e·l paire,
		nobles er lo conqueremens,
		e sera·m donatz iauzimens
	40	de dompna ses cor vaire.
VI		E na Jauzida ys iauzimens,
		que ia d'aisso que ben comens,
		no·s volra pueys estraire.