Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 418,001 Auteur: Reforsat de Forcalquier Genre: Sirventes Numero: CXXXI

En aquest son, qu'eu trop leugier e pla

I	1	En aquest son, qu'eu trop leugier e pla,
		voill far auzir un sirventes venal.
		d'avol razon ni d'ome que no val,
		non es blasmatz qui bon cantar no fa;
	5	e si en Guillems se gardes de faillir
		si co·is garda c'om no·n deu nuill ben dir,
		el fora tant sobrelz pros plus valenz
		com es sotz els aunitz e recrezenz.
II		A totz aug dir que·l paire semblara,
	10	cui trobet hom trop menor de leial.
		e car lo fil trob'hom tot atretal,
		per so es tortz car sa terra non a;
		qu'el non ditz ver, si non cuia mentir,
		ni non ama, si non cuia trair;
	15	e pois aitals es sos captenemens,
		a dieu grazisc car non es mos parenz.
III		Pauc cada pauc sai que.s lesnegara
		del meich castel; pois mermera ostal;
		e car conosc que trop sap e pauc val,
	20	no·m meravill, si terra no·ill rema,
		car el pert totz sos amicx per maldir
		e laissa honratz sos enemicx querir;
		e'stera·il lait s'il pogues valer meinz,
		car fai ni ditz tans mortals faillimenz.
IV	25	Si·s conort' e ad orde·s donera,
		pois nostre coms no·ill fara ben ni mal.
		en aisso pert lo gazaing e·l captal,
		car dieus no vol desleial ermita,
		mas cel acuoill que·ill sapcha en grat servir,
	30	lais lo segle, anz que·l segles l'air;
		mas Guillems es tant blasmatz per las genz
		que dieus no·l vol e·l segles lo vol meinz.
V		Tant fai sos faitz a lei d'ome aura
		que del tot s'es gitatz a no-me·n-cal.
	35	nien de letras e de sen natural
		lo trobarez; gardatz que·n devenra!
		que per destral no·is pot totz temps formir
		ni per joglar, si tot sí sab maldir
		que per maldir pren hom grans per las denz,
	40	e par nadel, car es tan maldizenz.
VI		Guillems joglars es leus a convertir
		als enemics, pois pot gabar e dir
		qu'en luoc non va ab tant petit de gentz,
		que, si·ls troba, c'ades non torn ab meinz.